पुणे : राष्ट्रीय स्वयंसेवक संघ, विश्व हिंदू परिषद व बजरंग दलाचे समर्थन करणारे लोकही तालिबानी मानसिकतेचे आहेत, असे विधान करणा-या प्रसिद्ध गीतकार जावेद अख्तर यांच्या प्रतिमेला विश्व हिंदू परिषद पूर्व पुणे विभागातर्फे जोडे मारुनआंदोलन करण्यात आले. जावेद अख्तर यांच्या वक्तव्याचा निषेध करण्याकरीता मंडईतील टिळक पुतळ्यासमोर हे आंदोलन करण्यात आले.
आंदोलनाला विश्व हिंदू परिषद पश्चिम महाराष्ट्र प्रांत विशेष संपर्कप्रमुख किशोर चव्हाण, मठमंदिर संपर्क प्रमुख मनोहर ओक, प्रांत सदस्य श्रीकांत चिल्लाळ, पूर्व पुणे विभाग मंत्री धनंजय गायकवाड, विभाग सहमंत्री संतोष अनगोळकर, कसबा भाग मंत्री गणेश वनारसे, सहमंत्री महेश अमराळे, मातृशक्ती प्रमुख सरिता अंबिके, ओंकार नाईक, कुणाल जगताप, प्रकाश रेड्डी आदी उपस्थित होते.
किशोर चव्हाण म्हणाले, राष्ट्रीय स्वयंसेवक संघ, विश्व हिंदू परिषद व बजरंग दलाची तुलना जावेद अख्तर यांनी तालिबानींशी केली आहे. राष्ट्र प्रथम ही या संघटनांची विचारधारा आहे. तिन्ही संघटनांनी रस्त्यावर उतरुन वेळोवेळी समाजासाठी कार्य केले आहे, याची माहिती अख्तर यांना दिसत नाही. कोविड काळात देखील या संघटनांचे मोठे काम सर्वांनी पाहिले आहे. जे घराबाहेर कधीच पडले नाहीत, त्यांनी अशी वक्तव्ये करणे चुकीचे आहे, असेही त्यांनी सांगितले.
