मुंबई, दि. १८ जानेवारी – कॉग्रेसचे प्रदेशाध्यक्ष नाना पटोले यांनी या देशाचे पंतप्रधान नरेंद्र मोदी यांना मारण्यासंदर्भात अत्यंत हीन दर्जाचे वक्तव्य केले. नाना पटोले यांच्या या वक्तव्यासाठी त्यांच्यावर राज्य सरकारला कारवाई करण्याचे राज्यपालांनी निर्देश द्यावेत, या मागणीसाठी मुंबई भाजपचे अध्यक्ष आमदार मंगलप्रभात लोढा यांच्या नेतृत्वाखाली भाजपच्या शिष्टमंडळाने राज्यपाल भगतसिंग कोशारी यांची भेट घेऊन निवेदन सादर केले.
निवेदन सादर केल्यानंतर प्रसारमाध्यमांशी बोलताना दरेकर म्हणाले की, हा देशाच्या पंतप्रधानांचा म्हणजे देशाचा अपमान आहे. नाना पटोले यांच्यावर कारवाई करण्याच्या राज्य सरकारला तात्काळ सूचना द्याव्यात, असे निवेदन राज्यपालांना देण्यात आले आहे. त्या निवेदनावर कार्यवाहीचे आश्वासन राज्यपालांनी दिले आहे. संविधानाचा, घटनेचा, विचारांचा खून करण्याचे काम सरकारच्या आशीर्वादाने सुरू आहे हे राष्ट्रपतींना कळवा, अशी विनंतीही निवेदनात करण्यात आली आहे. तसेच उद्या बुधवारी मंगलप्रभात लोढा यांच्या नेतृत्वाखाली गांधी पुतळ्यासमोर उपोषण केले जाणार आहे. भाजयुमोचे अध्यक्ष तेजिंदर सिंग तिवाना यांच्या नेतृत्वाखाली प्रखर आंदोलन केले जाणार आहे. पंतप्रधानांचा कोणत्याही प्रकारचा अपमान सहन केला जाणार नाही. त्यासाठी भाजपतर्फे सर्व प्रकारची आंदोलने केली जातील, असा इशाराही विरोधी पक्षनेते प्रविण दरेकर यांनी यावेळी दिला. यावेळी विधान परिषदेचे विरोधी पक्ष नेते प्रविण दरेकर, मुंबई भाजपाचे अध्यक्ष, आमदार मंगलप्रभात लोढा, आमदार मनिषा चौधरी, आमदार कालिदास कोळंबकर,भाजपाचे सरचिटणीस संजय उपाध्याय,उपाध्यक्ष पवन त्रिपाठी, भाजयुमोचे अध्यक्ष तेजिंदर सिंग तिवाना मुंबई आदी मान्यवर उपस्थित होते.
नाना पटोले यांच्यावर कारवाई झाली नाही तर चर्चगेट येथील गांधीजी यांच्या पुतळ्याजवळ उपोषणाला बसणार
आमदार मंगल प्रभात लोढा
उद्या बुधवार दि.१९ जानेवारी २०२२ रोजी सकाळी ११ वाजेपर्यंत काँग्रेस महाराष्ट्र प्रदेश अध्यक्ष नाना पटोले यांच्यावर कारवाई झाली नाही तर चर्चगेट येथील गांधीजी यांच्या पुतळ्याजवळ उपोषणाला बसणार असल्याचा इशारा मुंबई भाजपा अध्यक्ष व आमदार श्री. मंगल प्रभात लोढा यांनी राज्यपाल यांच्या भेटी दरम्यान दिला.