पुणे : पुण्यातील प्रतिष्ठित व आघाडीची फॅशन व डिझायनिंग इन्स्टिट्यूट असलेल्या ‘सूर्यदत्ता इन्स्टिट्यूट ऑफ फॅशन टेक्नॉलॉजी’ला (एसआयएफटी) नुकतेच ‘नॅशनल एज्युकेशन एक्सलन्स ॲवॉर्ड्स २०१७’ या पुरस्कार सोहळ्यात ‘बेस्ट फॅशन डिझायनिंग इन्स्टिट्यूट इन महाराष्ट्र’ हा पुरस्कार देऊन गौरवण्यात आले. नवी दिल्लीत शांग्रिलाज इरॉस हॉटेलमध्ये हा शानदार समारंभ झाला. ‘नॅशनल एज्युकेशन एक्सलन्स ॲवॉर्ड्स’ या पुरस्कारांचे आयोजन ‘प्रॅक्सिस मीडिया’तर्फे करण्यात आले. शिक्षण क्षेत्रातील सर्वोत्कृष्टतेला दिमाखदार शैलीने गौरवत प्रोत्साहन देणे, हा त्यामागील हेतू होता. या सोहळ्याला शिक्षण क्षेत्रातील नामवंतांची उपस्थिती होती.
‘सूर्यदत्ता ग्रुप ऑफ इन्स्टिट्यूट्स’चे अध्यक्ष प्रा. डॉ. संजय चोरडिया यांनी ज्येष्ठ राजकीय नेते व संसद सदस्य अमर सिंग आणि केंद्रीय मानवी साधनसंपत्ती विकास मंत्रालयाच्या ‘नॅशनल इन्स्टिट्यूट फॉर ओपन स्कूलिंग’चे अध्यक्ष प्रा. चंद्रभूषण शर्मा यांच्या हस्ते हा पुरस्कार स्वीकारला. प्रा. डॉ. चोरडिया यांच्यासाठी हा खरोखरच अभिमानाचा क्षण होता.
यासंदर्भात प्रतिक्रिया व्यक्त करताना प्रा. डॉ. चोरडिया म्हणाले, की आमच्या विद्यार्थ्यांनी कंपनी जगतात खात्रीशीर यश मिळवावे, या हेतूने आम्ही त्यांना किफायती शुल्कात दर्जेदार शिक्षण देऊन कल्याणकारी विकास साधतो आणि याकामी सर्वोत्कृष्टता मिळवण्यासाठी सर्वतोपरी प्रयत्न करतो. फॅशन जगतात उज्ज्वल भवितव्यासाठी लाभदायी करिअर घडवण्यासाठी आम्ही विद्यार्थ्यांना अनोख्या संधीही मिळवून देतो.
‘एसआयएफटी’तर्फे वर्ष २०१० पासून फॅशन डिझायनिंग विषयातील बॅचलर्स व मास्टर्स डिग्री, तसेच सर्टिफिकेट कोर्सेस व ॲडव्हान्स्ड कोर्सेस असे अभ्यासक्रम राबवले जातात. इतकेच नव्हे, तर ही संस्था आपल्या विद्यार्थ्यांना अनेक कॉर्पोरेट सोशल रिस्पॉन्सिबिलीटी (सीएसआर) उपक्रमांतही सहभागी करुन घेते. गरजू महिलांना फॅशन डिझायनिंगचे मोफत प्रशिक्षण देण्याचा उपक्रम हा त्यापैकीच एक उल्लेखनीय. गेल्या सात वर्षांत संस्थेने ३००० हून अधिक महिलांना या मार्गाने यशस्वी प्रशिक्षीत केले आहे.
‘नॅशनल एज्युकेशन एक्सलन्स ॲवॉर्ड्स’च्या पुरस्कारार्थींची निवड एका स्वतंत्र परीक्षक मंडळातर्फे केली जाते. विजेत्यांच्या निवडीसाठी पात्रता व व्यावसायिक अनुभव, पायाभूत सुविधा व सोयी, बाजारपेठेतील उपस्थिती व स्पर्धा, प्रगती व नफाक्षमता, गुणवत्ता व कार्यात्मक उत्कृष्टता, वित्तीय व व्यावसायिक कौशल्य, सेवांमधील अभिनवता व नावीन्य, अस्सलता व कल्पकता, शाश्वतता व पर्यावरणात्मक सजगता, नोकरी व प्रभावाचे सुप्त सामर्थ्य, ग्राहक व उद्योगांचा प्रतिसाद, तंत्रज्ञान व कल यांचा वापर, जोखीम व आघात पचवण्यासाठी केलेले प्रयत्न, पूर्वी मिळालेले पुरस्कार व कामगिरी असे ठळक निकष वापरले जातात.
यंदा पुरस्कार सोहळ्याला उपस्थित राहिलेल्या नामवंतांमध्ये उत्तर प्रदेशचे व्यापारी शिक्षण, कौशल्य विकास, क्रीडा व युवक कल्याण मंत्री चेतन चौहान, ज्येष्ठ राजकीय नेते व संसद सदस्य अमर सिंग, माजी क्रिकेटपटू नयन मोंगिया, राजकीय नेत्या व भारतीय राष्ट्रीय काँग्रेसच्या राष्ट्रीय प्रवक्त्या प्रियांका चतुर्वेदी, ‘एनसीईआरटी’चे शिक्षण अधिष्ठाता प्रा. सरोज यादव, केंद्रीय मानवी साधनसंपत्ती विकास मंत्रालयाच्या ‘नॅशनल इन्स्टिट्यूट फॉर ओपन स्कूलिंग’चे अध्यक्ष प्रा. चंद्रभूषण शर्मा आदींचा समावेश होता.
