पुणे- राजेश वाधवान समुह यांच्या मालकीच्या इंडियन सुपर लीग(आयएसएल)मधील क्लब असलेल्या एफसी पुणे सिटी संघाने अर्जेंटिनाच्या रॉबेर्टिनो पुगलिआरा याला करारबध्द केले आहे. इंडियन सुपर लीग स्पर्धेत रॉबेर्टिनो हा पहिल्यांदाच पर्दापण करत असून एफसी पुणे सिटीने एमिलिआनो अल्फारो, मार्सिलिन्हो, डिएगो कार्लोस व जोनातन लुक्का या खेळाडूंसह करारबध्द केलेला हा दक्षिण अमेरिकेतील पाचवा खेळाडू आहे.
रॉबेर्टिनो पुगलिआरा याचा एफसी पुणे सिटी संघात समावेश केल्याची अधिकृत घोषणा एफसी पुणे सिटीचे मुख्य कार्यकारी अधिकारी गौरव मोडवेल यांनी आज केली. रॉबेर्टिनो हा अनुभवी, सर्जनशील व अष्टपैलु मध्यरक्षक आहे. त्याचा समावेश संघासाठी जमेची बाजू ठरणार आहे आणि त्याची उत्कृष्ट कार्यशैली हे प्रतिस्पर्ध्यांसाठी कडवे आव्हान असणार आहे. एफसी पुणे सिटी संघात मी त्याचे स्वागत करतो, असे मोडवेल यांनी नमुद केले.
रॉबेर्टिनो याने आपल्या कारकिर्दीची सुरूवात सॅन लोरेंझो संघाकडून केली. त्यानंतर तो टॉलेरेस दी कोर्दोबा संघाकडून २ वर्षे खेळत होता. त्याने आपल्या कारकिर्दीतील सर्वाधिक काळ पर्सिजा जकार्ता, पेर्सिबा बालीकपापण, पीएसएम मसकास्सर, पेर्सिब बदुंग व पेर्सिपुरा जयपुरा या इंडोनेशियन क्लबकडून खेळण्यात घालवला. त्याच्या लक्षवेधी कामगिरीमुळे पेर्सिजा जकार्ता संघाने २०११ व २०१२ मध्ये सलग दोन वर्षे ट्रोफओपेर्सिजाचे विजेतेपद पटकावले.
एसीएफसी कपमध्ये रॉबर्टिनोने बेंगळुरू संघाविरुद्ध पर्थिपुरा जेयपुराचे प्रतिनिधित्व केले. 2015 च्या एएफसी कप स्पर्धेत बेंगळूर संघाविरुद्ध त्याने उत्कृष्ट खेळी करत बेंगळूर संघाची चांगलीच कोंडी केली होती.
संघातील सहभागाबाबत बोलताना रॉबर्टिनो म्हणाला की, माझ्या कारकीर्दीची ही नवीन सुरूवात आहे. माझ्या कारकीर्दीतील बहुतेक वेळा इंडोनेशियात खेळताना नवीन संस्कृती, नवीन शैली मी स्विकारल्या आहेत. एएफसी सामन्यां दरम्यान मी भारतातील अव्वल खेळाडूंना पाहीले आहे. त्यांची गुणवत्ता पाहून मी अतिशय प्रभावित झालो आहे. अशा प्रतिभावान भारतीय खेळाडूंशी स्पर्धा करण्यासाठी मी उत्सुक आहे.