अभिनेता सुबोध भावे, महिला क्रिकेटपटू मोना मेश्राम , विवेक वेलणकर ,
ह. भ. प. महंत पुरुषोत्तम पाटील ,बरखा जळगावकर यांची निवड
पुणे-
पुणे नवरात्रौ महोत्सवांतर्गत अभिनेता सुबोध भावे , भारतीय क्रिकेटपटू मोना मेश्राम , माहिती अधिकार कार्यकर्ते व स्वयंसेवी संस्थांचे प्रतिनिधी विवेक वेलणकर, ह. भ. प. महंत पुरुषोत्तम पाटील, लावणी सम्राज्ञी बरखा जळगावकर यांना यंदाचा श्री लक्ष्मीमाता कला -संस्कृती जीवनगौरव पुरस्कार जाहीर करण्यात आल्याची माहिती माजी उपमहापौर व पुणे नवरात्रौ महोत्सवाचे अध्यक्ष आबा बागुल यांनी दिली.
यावेळी महोत्सवाचे अध्यक्ष व माजी उपमहापौर आबा बागुल म्हणाले की, कला , संस्कृती ,नृत्य , गायन ,वादन यांचा मनोहारी संगम असलेला पुणे नवरात्रौ महोत्सव यंदा २३ वे वर्ष साजरे करीत आहे . या महोत्सवाअंतर्गत विविध क्षेत्रात उल्लेखनीय कार्य करणाऱ्या व्यक्तींचा श्री लक्ष्मीमाता कला -संस्कृती जीवनगौरव पुरस्काराद्वारे गौरव करण्यात येतो. यंदा अभिनेता सुबोध भावे यांना उत्कृष्ट अभिनयाबद्दल तर भारतीय महिला क्रिकेट संघात उत्कृष्ट कामगिरी करणाऱ्या मोना मेश्राम यांना उत्कृष्ट क्रिकेटपटू तसेच स्वयंसेवी संस्थांच्या माध्यमातून सामाजिक कार्यात भरीव योगदान देताना माहिती अधिकार कायद्याचा प्रभावी वापर करून समाजाचे प्रश्न सोडविणारे सजग नागरिक मंच, पीएमपी प्रवासी मंचचे विवेक वेलणकर यांना उत्कृष्ट सामाजिक कार्याबद्दल तर विविध विषयांवर भजन -कीर्तनाद्वारे समाजामध्ये प्रबोधन करणारे ह.भ.प. महंत पुरुषोत्तम पाटील यांना आध्यात्मिक पुरस्कार आणि लावणी सम्राज्ञी बरखा जळगावकर यांना कलाविष्कार पुरस्कार प्रदान करून या सर्वांचा सन्मान करण्यात येणार आहे .श्री गणेश कला क्रीडा रंगमंच येथे २१ सप्टेंबर ते ३० सप्टेंबरपर्यंत विविध कार्यक्रमांनी हा पुणे नवरात्रौ महोत्सव साजरा होणार असल्याचेही आबा बागुल यांनी सांगितले.
