पुणे, 28 एप्रिल 2022: फर्ग्युसन कॉलेज आणि नंदन बाळ टेनिस अकादमी यांच्या तर्फे आयोजित व एमएसएलटीए आणि एआयटीए यांच्या मान्यतेखाली होत असलेल्या डी.ई.एस. फर्ग्युसन कॉलेज चॅम्पियनशीप सिरीज 18वर्षांखालील टेनिस अजिंक्यपद स्पर्धेत मुलांच्या गटात निशित रहाणे याने तर, मुलींच्या गटात अस्मि आडकर या खेळाडूंनी एकेरी व दुहेरी या दोन्ही गटाच्या अंतिम फेरीत प्रवेश करत दुहेरी मुकुटाकडे वाटचाल केली आहे.
फर्ग्युसन कॉलेज टेनिस कोर्ट येथे सुरु असलेल्या या स्पर्धेत एकेरीत मुलींच्या गटात उपांत्य फेरीत चौथ्या मानांकित अग्निमित्रा भट्टाचार्य हिने प्रतिष्ठा सैनीचा 6-2, 6-3 असा सरळ सेटमध्ये पराभव केला. महाराष्ट्राच्या सहाव्या मानांकित अस्मि आडकरने तेलंगणाच्या हिया मेहताचा 6-0, 6-0 असा एकतर्फी पराभव करून अंतिम फेरीत आपले स्थान निश्चित केले.
मुलांच्या गटात सातव्या मानांकित निशीत रहाणे याने अंशुल सातवचा 6-2, 6-1 असा सहज पराभव करून अंतिम फेरी गाठली. सहाव्या मानांकित पुण्याच्या तनिष्क जाधव याने आपली अनपेक्षित निकालाची मलिका कायम ठेवत दुसऱ्या मानांकित साहिल तांबटचा 6-2, 6-4 असा पराभव करून अंतिम फेरीत धडक मारली.
दुहेरीत उपांत्य फेरीत मुलींच्या गटात अस्मि आडकर व प्रिशा शिंदे यांनी धन्वी काळे व अग्निमित्रा भट्टाचार्या या अव्वल मानांकित जोडीचा 6-1, 6-0 असा तर दुसऱ्या मानांकित मृण्मयी जोशी व श्रुती नानजकर या जोडीने रजिथा राजेश व प्रतिष्ठा सैनी यांचा 7-6(0), 7-5 असा पराभव करून अंतिम फेरीत प्रवेश केला. मुलांच्या गटात जय दिक्षीतने निशित रहाणेच्या साथीत सिद्धार्थ मराठे व अंशुल सातव यांचा 6-2, 6-4 असा पराभव करून अंतिम फेरी गाठली.
निकाल: मुख्य ड्रॉ(उपांत्य फेरी): मुले:तनिष्क जाधव(महा)[6]वि.वि.साहिल तांबट(महा)[2] 6-2, 6-4;निशीत रहाणे(महा)[7] वि.वि.अंशुल सातव(महा) 6-2, 6-1;
मुली:अग्निमित्रा भट्टाचार्य(महा)[4]वि.वि.प्रतिष्ठा सैनी(महा) 6-2, 6-3; अस्मि आडकर(महा)[6] वि.वि.हिया मेहता(तेलंगणा) 6-0, 6-0;
दुहेरी गट: मुले: जय दिक्षीत/निशित रहाणे वि.वि.सिद्धार्थ मराठे/अंशुल सातव 6-2, 6-4;अर्णव कोकणे/आर्यन कोटस्थाने[3] वि.वि.तनिष्क जाधव/अनमोल नागपुरे[2]6-7(4), 7-6(0), 12-10;
मुली:अस्मि आडकर/प्रिशा शिंदे वि.वि.धन्वी काळे/अग्निमित्रा भट्टाचार्या[1] 6-1, 6-0;मृण्मयी जोशी/श्रुती नानजकर[2]वि.वि.रजिथा राजेश/प्रतिष्ठा सैनी[4] 7-6(0), 7-5.