पुणे-: पुणे-मुंबई लोहमार्गावर रात्री 10.50 वाजण्याच्या सुमारास लोणावळ्यातील मंक्की हिलजवळ अप व मिडल या दोन्ही मार्गावर दरड कोसळल्याने रेल्वे सेवा ठप्प झाली आहे. दरड कोसळल्यानं शनिवारी अनेक लांब पल्ल्याच्या गाड्या विविध स्थानकांवर थांबवण्यात आल्या होत्या. रात्री 12.30 वाजण्याच्या सुमारास रेल्वेच्या अप लाईनवरील दरड हटवून हा मार्ग सुरु करण्यात आला असला तरीही मिडल लाईन ही बंदच आहे. या मार्गावरील दरड हटवण्याचं काम सुरु असून मिडल लाईन सुरु होण्यास आणखी कालावधी लागणार आहे.
मंक्की हिलजवळ दरड कोसळल्याने कोल्हापूर-अहमदाबाद ही गाडी खंडाळा रेल्वे स्थानकावर थांबविण्यात आली तर सोलापूरला जाणारी सिद्धेश्वर एक्स्प्रेस सीएसटीलाच थांबविण्यात आली होती. यासह रात्रीच्या वेळेला धावणार्या अनेक लांब पल्ल्याच्या गाड्या उशिराने धावल्या. लोणावळा व खंडाळा परिसरात मागील काही दिवसांपासून पावसाचा जोर असल्याने डोंगरभागातील दगड मार्गावर येऊ लागले आहे
शनिवारी रात्री कोसळलेली दरड ही अप व मिडल या दोन्ही मार्गावर मोठ्या प्रमाणात पडल्याने वाहतुकीचा पूर्णतः खोळंबा झाला होता. ही दरड पडल्याची माहिती समजल्यानंतर तातडीने लोणावळा व कल्याण येथील आपत्कालीन यंत्रणा घटास्थळी दाखल झाली, त्यांनी मोठे दगड हटवण्याचे काम सुरू करत अप लाईन मध्यरात्री सुरू केल्याने उशिराने का होईन रेल्वे सेवा धीम्या गतीने सुरू झाली. मिडल लाईनवरील दरड बाजूला करण्याचे काम सुरु असल्याने ती रात्रभर बंद होती. सकाळी देखील याठिकाणी काम सुरू असून ते पूर्ण झाल्यानंतर मिडल लाईन सुरु करण्यात येणार आहे.