पुणे : सिंचन आणि बिगर सिंचन पाणी वापरापोटी पुणे महानगरपालिका आणि जिल्ह्यातील विविध साखर कारखान्यांकडे जलसंपदा विभागाची कोट्यवधी रुपयांची थकबाकी असल्याचे समोर आले आहे. याबाबत कालवा सल्लागार समितीच्या बैठकीत चर्चा झाली असून तातडीने ही थकबाकी भरण्याच्या सूचना देण्यात आल्या आहेत.
जिल्ह्यातील साखर कारखान्यांनी जलसंपदा विभागाच्या खडकवासला आणि नीरा प्रणाली या विभागांची कोट्यवधी रुपयांची बिगर सिंचनाची थकबाकी थकवली आहे. कारखान्यांच्या व्यवस्थापनास वारंवार थकबाकी भरण्याबाबत सूचना देऊनही अद्याप ही थकबाकी भरण्यात आलेली नाही. जलसंपदा विभागाकडून खडकवासला आणि नीरा प्रणालीच्या माध्यमातून पंधराहून अधिक कारखान्यांना वापरासाठी (बिगर सिंचन) पाणी देण्यात येते. मात्र, या कारखान्यांनी गेल्या काही वर्षांपासूनची पाणीपट्टी थकवली आहे. अनेकवेळा नोटिसा बजावूनही पाणीपुरवठा बंद होऊ नये, म्हणून तोकडी रक्कम भरण्याकडे कारखान्यांचा कल असल्याचे जलसंपदा विभागाकडून सांगण्यात आले.
गेल्या वर्षी मार्चअखेर यशवंत सहकारी साखर कारखान्याकडे २०.४६ कोटी, संत तुकाराम कारखान्याकडे ९.७८ कोटी, कर्मयोगी कारखाना २.८४ कोटी, भीमा पाटस कारखाना १४८.८७ कोटी, दौंड शुगर ७५.६१ कोटी, बारामती अॅग्रो ३.६८ कोटी, अनुराज शुगर्स ३७.४९, व्यंकटेश शुगर १.३२, श्रीनाथ म्हस्कोबा ३६.८३, श्रीगोंदा कारखाना १०.९४, घोडगंगा कारखाना १७.५९ अशी मिळून एकू ण ३६५.४१ कोटी रुपयांची थकबाकी आहे.
महापालिकेकडे २८६.१९ कोटींची थकबाकी
पुणे महापालिके कडे नियमित पाणीपट्टी ५९ कोटी, औद्योगिक पाणी वापरापोटी १५२.१० कोटी अशी एकू ण २११.१० कोटी रुपयांची थकबाकी आहे. तसेच जुना मुठा कालवा जागेचा प्रलंबित भाडेपट्टा ०.८५ कोटी, जलवाहिनी भाटेपट्टा ७३.७७ कोटी, नवीन मुठा उजवा कालवा आणि जलवाहिनीचा भाडेपट्टा अशी ७५.०९ कोटी रुपयांची थकबाकी आहे. ही दोन्ही मिळून एकू ण महापालिके कडे २८६.१९ कोटी रुपयांची थकबाकी असल्याचे जलसंपदा विभागाकडून सांगण्यात आले.
दोन उन्हाळी आवर्तने
शेतीसाठी रब्बी हंगामात ३३ दिवसांमध्ये २.७३ अब्ज घनफू ट (टीएमसी) पाणी सोडल्यानंतर उन्हाळ्यात दोन आवर्तने घेण्यात येणार आहेत. त्यानुसार पहिले आवर्तन २२ फे ब्रुवारी ते १५ एप्रिल या कालावधीत घेतले जाणार असून या काळात ४.४० टीएमसी पाणी शेतीसाठी सोडले जाणार आहे. त्यानंतर दुसरे आवर्तन घेतले जाणार आहे. याबाबतची माहिती जलसंपदा विभागाने कालवा सल्लागार बैठकीत सादरीकरणावेळी दिली.
