पुणे :‘भारतीय विद्या भवन‘ आणि ‘इन्फोसिस फाऊंडेशन‘च्या सांस्कृतिक प्रसार कार्यक्रमांतर्गत चारूशीला गोसावी प्रस्तुत ‘व्हायोलिन गाते तेव्हा’ कार्यक्रमाचे आयोजन करण्यात आले आहे. सुगम संगीत, चित्रपट संगीत आणि जुन्या हिंदी संगीताची ही सुरेल मैफल रसिकांसाठी असणार आहे. सांस्कृतिक प्रसार कार्यक्रम मालिकेतील हा ५१ वा कार्यक्रम आहे.
हा कार्यक्रम शुक्रवार, दिनांक 10 ऑगस्ट 2018 रोजी ‘भारतीय विद्या भवन‘चे ‘सरदार महादेव बळवंत नातू सभागृह‘, सेनापती बापट रोड येथे सायंकाळी 6 वाजता होणार आहे. ‘भारतीय विद्या भवन’चे मानद सचिव प्रा. नंदकुमार काकिर्डे यांनी ही माहिती पत्रकाद्वारे दिली.
चारूशीला गोसावी या व्हायोलिन वाद्यावर शास्त्रीय संगीत, नाट्गीते, मराठी – हिंदी चित्रपटातील प्रसिद्ध गीते, अभंग सादर करणार आहेत.
कार्यक्रमाचे निवेदन राजय गोसावी करणार आहेत. डॉ. राजेंद्र दूरकर (तबला), अमृता ठाकूरदेसाई (सिंथेसायझर), राजेंद्र साळुंके (ताल वाद्ये) हे साथ संगत करतील, अशी माहिती चारूशीला गोसावी यांनी दिली.
चारूशीला गोसावी या गेली 37 वर्षे व्हायोलिन वादन सादर करत आहेत. त्यांनी आत्तापर्यंत शास्त्रीय, सुगम संगीत कार्यक्रमांमध्ये सोलो वादन आणि साथसंगत केली आहे. त्यांचे वडिल भालचंद्र देव यांच्या कडून त्यांनी ही विद्या आत्मसाद केली आहे. 2012 मध्ये बाबा आमटे यांच्या ‘हेमलकसा’ संस्थेच्या मदतीसाठी देखील त्यांनी व्हायोलिन गाते तेव्हा या कार्यक्रमाचे सादरीकरण केले होते
