माहितीचा स्त्रोत विचारला जाऊ शकत नाही -फडणवीस
मुंबई-घोटाळे बाहेर काढणाऱ्यांना महाविकास आघाडी सरकार पोलिस ठाण्यात पाठवत आहे. मी घोटाळेबाज महाविकास आघाडीचा भांडाफोड केला, म्हणून मला फोन टॅपिंग प्रकरणात पोलिसांकडून नोटीस पाठवली गेली असा आरोप विरोधी पक्षनेते देवेंद्र फडणवीस यांनी आज पत्रकार परिषदेत केला. मी पोलिसांना तपासात मदत करणार असल्याचेही ते म्हणाले.
फडणवीस म्हणाले, 12 मार्च 1993 ला मुंबईत बाँम्बस्फोट झाला होता. 29 वर्षानंतरही या आठवणी वेदनादायी व ताज्या आहेत. बाँम्बस्फोटीतील आरोपीशी संबंधित लोक जेलमध्ये जाऊ नये असे प्रयत्न सत्ताधारी महाविकास आघाडीकडून होत आहे त्याबद्दल मी खंत व्यक्त करतो.
गत वर्षी मी गृहविभागातील महाघोटाळा बाहेर काढला होता. त्याचे पुरावे माझ्याकडे आहेत हे मी सांगितले होते. घोटाळ्याची माहिती मी दिल्लीत देशाच्या गृहसचिवांना सादर केली. त्याचे गांभिर्य ओळखून न्यायालयाने यासंबंधीची चौकशीचे आदेश सीबीआयला दिले. या सर्व घोटाळ्याच्या चौकशीत अनिल देशमुखांचीही चौकशी केली जात आहे.
ही चौकशी सीबाआयकडे गेली, त्यावेळी राज्य सरकारने आपला घोटाळा दाबण्यासाठी एक एफआयआर दाखल केला. याच प्रकरणात पोलिसांनी मला प्रश्नावली पाठवली व ही माहिती आपल्याकडे कुठुन आली ही विचारणा केली. पण याचे उत्तर मी देऊ शकत नाही असे त्यांना सांगितले. त्यानंतर मला मुंबई पोलिसांनी सीआरपीसीच्या कलम 163 नुसार नोटीस पाठवली. त्यांनी दाखल केलेल्या एफआयआरनुसार मला पोलिसांचे बोलावणे आले आहे. मी पोलिस ठाण्यात उद्या सकाळी 11 वाजता जाणार आहे अशी माहिती त्यांनी दिली.
माहितीचा स्त्रोत विचारला जाऊ शकत नाही
मी सांगतो की, माझ्या माहितीचा स्त्रोत विचारला जाऊ शकत नाही. मी माहिती देऊ शकत नाही. मी स्वःत पोलिसांकडे जाणार आहे. त्याला योग्य ते उत्तर देणार आहे. पोलिसांनी चुकीची केस केली असली तरीही मी त्यांना तपासात मदत करील. आताच हे प्रकरण बाहेर का आले, सहा महिने यावर कोणतीही कारवाई केली नाही. त्यामुळे सरकारचाच तपास करायला हवा असेही ते म्हणाले. मी परवा केलेल्या भांडाफोडीवर उत्तर सुचत नसल्याने हे कारनामे राज्य सरकारला सुचत आहेत असा आरोपही त्यांनी केला.
प्रवीण चव्हाण यांच्या व्हिडीओचे फाँरेन्सिक ऑडीट केले
प्रवीण चव्हाण यांच्या व्हिडीओचे फाँरेन्सिक ऑडिट केले आहे. प्रवीण चव्हाण यांनी माध्यमाला काल दिलेले वक्तव्य खोटे आहे. आता मला माहित आहे की, एखादा गुन्हा दाखल करून मला अडकवतील. हे मी होऊ देणार नाही. मी एक्स्पर्टचा सल्ला घेणार आहे असेही ते म्हणाले.