पुणे- महापालिकेत 10 नगरसेवकांचे बळ असलेल्या शिवसेने ची कसबा विधानसभा मतदार संघावर आता विशेष नजर असताना या मतदार संघातील इच्छुक असलेले नगरसेवक विशाल धनवडे यांची आज पालिकेच्या स्थायी समितीवर नियुक्ती करण्यात आल्याने सर्वांना आश्चर्याचा धक्का बसला . संख्याबळानुसार शिवसेनेचा एक नगरसेवक स्थायी समितीवर निवडून जाऊ शकतो . त्यानुसार नगरसेविका संगीता ठोसर या स्थायी समितीवर २ वर्षे कालावधी साठी निवडून गेल्या होत्या. मात्र त्यांचा कालावधी पूर्ण होण्यापूर्वीच म्हणजे 1 वर्ष पूर्ण झाल्यावर त्यांनी राजीनामा दिला . याबाबत आपल्याला पक्षाने आदेश दिल्याने आपण राजीनामा दिल्याचे त्यांनी सांगितले.प्रत्येक नगरसेवकाला 1 वर्षे संधी द्यावी यानुसार ५ वर्षात ५ नगरसेवकांना संधी मिळेल असे सेना प्रमुखांचे आदेश आल्याने आपण राजीनामा दिला असे त्या म्हणाल्या . तर नगरसचिव सुनील पारखी म्हणाले , निवडणूक प्रक्रिया आज झाली नाही , मात्र ठोसर यांच्या राजीनाम्याने रिक्त झालेली जागा शिवसेनेची असल्याने त्यांच्या जागेवर श्व्सेनेच्या धनवडे यांची नियुक्ती करण्यात आली.
धनवडे यांनी मात्र कसब्यातून आपण जोरदार मुसंडी घ्यावी यासाठी स्थायी चे बळ पक्षाने आपल्याला दिल्याचा दावा केला आहे . दरम्यान आज अनेक शिवसैनिकांनी धनवडे यांना भेटून त्यांचे अभिनंदन केले .दरम्यान लोकसभा निवडणुकीची आचारसंहिता आणि त्यांनतर काही दिवसच महापालिकेत स्थायी समिती आणि मुख्य सभेला कामकाजासाठी मिळू शकतील आणि त्यानंतर तातडीने विधानसभेची आचारसंहिता जाहीर होईल असे दिसते आहे .
