पुणे : मुंढव्यातील पोटनिवडणुकीत राष्ट्रवादी काँग्रेसच्या उमेदवारआणि स्व.चंचला कोद्रे यांच्या जाऊबाई पूजा कोद्रेंनी बाजी मारली असून, राष्ट्रवादीचा गड राखला. कोद्रे यांनी शिवसेनेच्या मोनिका तुपे यांना 3 हजार 528 एवढ्या मतांनी पराभव केला. विशेष म्हणजे, या निवडणुकीत भाजपला जबरदस्त तडाखा मतदारांनी दिला आहे. भाजपच्या उमेदवार सुकन्या गायकवाड यांना तिसऱ्या क्रमाकांची मते मिळाली. या निकालामुळे हडपसरच्या राजकारणावर राष्ट्रवादीचा असलेला वरचष्मा पुन्हा अधोरेखित झाला आहे .माजी महापौर चंचला कोद्रे यांच्या निधनामुळे ही निवडणूक झाली. त्यासाठी राष्ट्रवादीने कोद्रे यांच्या जाऊबाई पूजा यांना तर भाजपने सुकन्या गायकवाड आणि शिवसेनेच्या मोनिका तुपे निवडणूक रिंगणात होत्या. या प्रभागातील एका जागेसाठी शुक्रवारी मतदान झाले.
या निवडणुकीत कोद्रे यांना 8 हजार 991 मते मिळाली. तर शिवसेनेने मुसंडी मारत 5 हजार 479 मते मिळविली. तर भाजपच्या गायकवाड यांना 4 हजार 334 मतांवर समाधान मानावे लागले. गेल्या निवडणुकीत गायकवाड यांना 11 हजार 400 मते मिळाली होती. सातत्याने पूर्व भागावर अन्याय करण्याचे पालिकेतील सत्ताधार्यांचे धोरण आणि त्याविरुद्ध चेतन तुपे, प्रशांत जगताप , वैशाली बनकर यांनी सातत्याने उठविलेले रान याचा परिणाम राष्ट्रवादीच्या विजयापेक्षा येथे भाजपची मते घटण्यात झाला आणि हे या निवडणुकीचे वैशिष्टय ठरले आहे.
या पोट निवडणूकीचा विचार करता हि निवडणूक केवळ चंचला कोद्रे यांच्याबाबत सहानुभूती म्हणून राष्ट्रवादीने जिंकली असे मानता येणार नाही तर २०१९ च्या आगामी निवडणुकीची हलकीशी चाहूल मानता येईल असा दावा करण्यात येतो आहे. भाजपने केलेल्या कारभाराची पावती त्यांना मिळेल असे या निकालाने दर्शवून दिल्याचे मानण्यात येते .भाजप आणि शिवसेनेच्या मतांचे विभाजन होणे कसे धोकादायक आहे आणि कॉंग्रेस आणि राष्ट्रवादीने आघाडी करणे कसे फायदेशीर ठरू शकेल हे देखील या निकालाने दाखवून दिले आहे .