पेट्रोल-डिझेलवरील कर केंद्रानेच कमी करावेत- उपमुख्यमंत्री अजित पवार

मुंबई- गेल्या 15 दिवसांपासून सुरू असलेल्या इंधन दरवाढीवर आज राज्याचे उपमुख्यमंत्री अजित पवार यांनी भाष्य केले आहे. मुंबईत पत्रकार परिषद घेत यासंदर्भात त्यांनी भूमिका मांडली आहे. पेट्रोल-डिझेलचे दर गगनाला भिडल्यामुळे जनता त्रस्त झाली आहे. त्यामुळे राज्यातील जनतेवर कोणताही नवा टॅक्स लावणार नाही. मात्र, राज्य सरकार पेट्रोल-डिझेलवरील करही कमी करणार नाही, असे त्यांनी स्पष्ट केले आहे. सामान्यांना दिलासा देण्यासाठी केंद्र सरकारनेच पेट्रोल-डिझेलवरील कर कमी करावेत. केंद्र सरकारचे कर राज्याच्या करापेक्षा कितीतरी अधिक आहे, असे अजित पवार यांनी म्हटले आहे. सीएनजी गॅसवरील हजारो कोटींचा कर कमी केला! राज्य सरकारने सीएनजीसह पीएनजी गॅसवरील हजारो कोटींचा कर कमी केला आहे. या निर्णयामुळे राज्यातील गृहिणी, ऑटोरिक्षाचालक, छोटे वाहतूकदार यांना मोठा दिलासा मिळाला आहे. आता पेट्रोल-डिझेलवरील कर राज्य सरकार कमी करू शकत नाही. त्यामुळे केंद्र सरकारनेच याबाबत दिलासा द्यावा, असे अजित पवार यांनी स्पष्ट केले आहे. तसेच, केंद्र सरकारने इंधनावरील दर कमी करावेत यासाठी राज्यात अनेक ठिकाणी राष्ट्रवादी काँग्रेस आणि काँग्रेसतर्फे आंदोलने सुरू आहेत. कधी नव्हे ऐवढे इंधनाचे दर गगनाला भिडले आहेत. याची दखल केंद्राने घ्यावी, असे आवाहनही त्यांनी केले आहे. शरद पवार – मोदींच्या भेटीबाबत भाष्य नाही! कालच राष्ट्रवादी काँग्रेसचे अध्यक्ष शरद पवार यांनी पंतप्रधान मोदी यांची भेट घेतली. त्यावर काही महत्त्वाच्या मुद्द्यासंबंधी चर्चा करण्यासाठी या दोन नेत्यांनी भेट घेतली होती. ही भेट झाल्यानंतर शरद पवार यांनी स्वत: याबाबत आपल्याला माहिती दिली, असे अजित पवार यांनी सांगितले. तसेच, भेटीबाबत शरद पवार यांनी काल स्वत: आपली भूमिका मांडली आहे. त्यामुळे त्याबाबत अधिक भाष्य मी करणार नाही. एकदा शरद पवारांनी भूमिका मांडल्यावर आम्हाला अधिक काही बोलण्याची गरज नाही, असेही अजित पवार म्हणाले. निधी वाटपाबाबत भेदभाव केला नाही! निधी वाटपाबाबत काँग्रेस आणि शिवसेनेच्या आमदारांमध्ये नाराजी असल्याचे विचारल्यानंतर निधी वाटपाबाबत मी कोणताही भेदभाव केला नाही, असे स्पष्टीकरण अजित पवार यांनी दिले. कोरोना काळात एकंदरित राज्याचा महसुलच अत्यंत कमी झाला होता. त्यामुळे निधीवाटपाबाबत अनेक अडचणी आल्या. मात्र, इतर पक्षांसोबत भेदभाव केला नाही. मात्र, आता सर्व सुरळीत होत असल्याने या तक्रारीही दूर केल्या जातील, असे अजित पवार म्हणाले