पुरंदर तालुक्यातून शेकडो शिवभक्त दिल्लीतील शिवजयंती उत्सवात सामील होणार
जेजुरी ( प्रतिनिधी ) – विश्ववंदनीय छत्रपती शिवाजी महाराज यांचा जयंती उत्सव सोहळा राष्ट्रोत्सव करण्याच्या उद्धेशाने खासदार छत्रपती संभाजीराजे छत्रपती प्रयत्नशील आहेत, येणारी शिवजयंती अखिल भारतीय शिवराज्यभिषेक महोत्सव समितीच्या वतीने मोठ्या स्वरूपामध्ये राजधानी दिल्लीत साजरी होणार असून पुरंदर तालुक्यातून सुद्धा शेकडो शिवभक्त दिल्लीतील शिवजयंती उत्सवात सामील होणार असल्याची माहिती दिल्ली शिवजयंती उत्सव समिती प्रमुख अजयसिंह सावंत यांनी दिली.
दिल्ली येथे असणाऱ्या मराठी, कुर्मी, जाट, पटेल तसेच पानीपत हरियाना भागातील रोड मराठा समाजाचा या उत्सवामध्ये मोठा सहभाग असणार आहे , दरवर्षी 6 जुनला रायगडावर अखिल भारतीय शिवराज्यभिषेक महोत्सव समितीच्या वतीने छत्रपती शिवरायांचा राज्याभिषेक दिन खूप थाटामाटात साजरा केला जातो , तसेच यंदा समितीने प्रथमच शिवजयंती उत्सववाला राष्ट्रीय स्तरावर मोठे स्वरूप देण्यासाठी १९ फेब्रुवारी ते २३ फेब्रुवारी या कालावधीत दिल्लीत शिवजयंती उत्सवाचे आयोजन केले आहे. खासदार संभाजीराजे छत्रपती यांच्या मार्गदर्शनाखाली समिती आतापासूनच दिल्लीत तयारीला लागली असून , या शिवजयंती उत्सव सोहळ्यात प्रधानमंत्री नरेंद्रजी मोदी, राष्ट्रपती रामनाथजी कोविंद, देशभरतील विविध राज्याचे मुख्यमंत्री , खासदार यांच्यासोबतच राजकीय, सामाजिक, सांस्कृतिक ,प्रशासकीय क्षेत्रातील विविध मान्यवर सहभागी होणार आहेत, दिल्ली येथील राजपथ जवळील इंदिरा गांधी नॅशनल सेंटर फॉर आर्ट्सच्या विस्तीर्ण मैदानावर यावेळी विशेष कार्यक्रमांचे आयोजन करण्यात आले असून यावेळी १९ फेब्रुवारी ते २३ फेब्रुवारी या काळात छत्रपती शिवाजी महाराजांवरील महानाट्याचे आयोजन सुद्धा करण्यात आले आहे , तसेच शिवजयंती दिवशी दिल्लीत रेली सुद्धा काढण्यात येणार असून या रेलीत ढोलताशा पथक , लेझीम पथक , वारकरी पथक सामील होणार आहेत, दिल्ली येथील शिवजयंती उत्सवाचे संपूर्ण संयोजन करण्याचा मान अजयसिंह सावंत यांच्या माध्यमातून पुरंदर तालुक्याला मिळाला असल्याने पुरंदरमधील जास्तीत जास्त शिवभक्त या सोहळ्यात सामील होणार असल्याची माहिती यावेळी देण्यात आली , यावेळी मार्तंड देव संस्थानचे विश्वस्त संदीप जगताप ,शिवव्याख्याते निलेश जगताप , संतोष हगवणे , कैलास केंजळे , सचिन हंबीर , अजय जगताप ,वासिम मणेर ,गौरव जगताप ,आनंद जंगम, विक्रम शिंदे , संतोष बयास ,रत्नसिंह सावंत, अभीजित भंडारी आणि इतर सदस्य उपस्थित होते.