निवेदन घेण्यास आयुक्त न आल्याने प्रशासनाचा निषेध
पुणे- शहराच्या पूर्व भागातील पाणी समस्या सोडविण्यासाठी आखण्यात आलेल्या भामाआसखेड योजनेचे काम ठप्प पडल्याने आज (शुक्रवार) राष्ट्रवादी काँग्रेसतर्फे रास्ता रोको आंदोलन करण्यात आले. तसेच या आंदोलनाबाबत कळवूनही निवेदन घेण्यास आयुक्त व इतर कोणीही न आल्याने प्रशासनाचाही तीव्र निषेध करण्यात आला.माजी आमदार बापूसाहेब पठारे, यांच्या मार्गदर्शनाखाली नगरसेवक महेंद्र पठारे, भैय्यासाहेब जाधव, संजिला पठारे, सुमन पठारे, वडगावशेरी विधानसभा मतदार संघातील कार्यकर्ते, पदाधिकारी यांच्या उपस्थितीत राष्ट्रवादी काँग्रेसतर्फे आज शुक्रवारी सकाळी अकरा वाजता चंदननगर येथे टाटा गार्डरूम पाण्याची टाकीजवळ रास्ता रोको आंदोलन करण्यात आले.पुणे शहरातील पूर्व भागातील पाणी पुरवठा विस्कळीत होत आहे. अपुरा पाणी पुरवठा व समस्या सोडविण्यासाठी भामा आसखेड धरणातून पाणी आणण्याची योजना आखण्यात आलेली होती. या पाईपलाईन मुळे पूर्व भागातील जनतेचा पाणी प्रश्न पूर्णपणे सुटण्यास मदत होणार आहे. त्यासाठी पाईपलाईनचे काम सुरू करण्यात आले. परंतु सद्यस्थितीत हे काम अडविल्यामुळे पूर्णपणे ठप्प झालेले आहे. योजनेचे काम पूर्ण न झाल्यास नागरिकांना भविष्यात पाणी टंचाईला सामोरे जावे लागणार आहे. यासाठी भामाआसखेड योजनेचे काम तातडीने सुरू करावे या मागणीसाठी राष्ट्रवादीकडून हे आंदोलन करण्यात आले. आंदोलनाबाबत आयुक्त कुणाल कुमार यांना पूर्वकल्पना देऊनही निवेदन स्वीकारण्यास प्रशासनाकडून कोणीही न आल्याने प्रशासनाचा देखील यावेळी तीव्र निषेध करण्यात आला.
