नाशिक – महापालिका निवडणुकीत १२२ पैकी ६६ जागा जिंकत स्पष्ट बहुमत भाजपने मिळवल्यानंतर नाशिकमध्ये महापौर व उपमहापौरपदाच्या निवडीवर आज भाजपचा शिक्कामोर्तब झाला. भाजपच्या ज्येष्ठ नगरसेविका रंजना भानसी या नवीन महापौर म्हणून निवडून आल्या तर प्रथमेश गिते यांच्या गळ्यात उपमहापौरपदाची माळ पडली आहे.
मुखमंत्री देवेंद्र फडणवीस यांनी दत्तक घेतलेल्या नाशिक महापालिकेत आज भाजपचे महापौर आणि उपमहापौर बिनविरोध निवडून आले. महापौर आणि उपमहापौरपदासाठी घेण्यात आलेल्या या निवडणुकात महापालिकेच्या इतिहासात पहिल्यांदाच भाजपचे उमेदवार बिनविरोध निवडून आले आहेत. याप्रसंगी महापौर रंजना भानसे भावूक झाल्या. यावेळी बोलताना, ”नाशिकच्या विकासासाठी आम्ही कटिबद्ध राहू”, असे वक्तव्य नवनिर्वाचीत महापौर रंजना भानसे यांनी केले. निकालानंतर महापालिकेच्या बाहेर भाजपच्या कार्यकर्त्यांनी एकाच जल्लोष केला. ‘रामायण’ या महापौर बंगल्याबाहेर फटाके वाजवत तसेच बंगल्यावर भाजपचा झेंडा लावत कार्यकर्त्यांनी आनंद साजरा केला. पालिका निवडणुकात नाशिकरांनी खूप मोठा विश्वास भाजपवर दाखवला आहे.