सांगली, : जुन्या पिढीतील लोकांच्या विरंगुळ्यासाठी सांगली येथे तयार करण्यात आलेला नाना-नानी पार्क हा उत्कृष्ट प्रकल्प आहे. आर्थिक, शैक्षणिक, औद्योगिक अशा सर्वच क्षेत्रात सांगली शहर बदलत चालले आहे. नागरिकांना सन्मान मिळावा यासाठी अशा प्रकारचे प्रकल्प घेण्याची जबाबदारी महापालिकेची असते. महानगरपालिकेने नाना-नानी पार्क हा चांगला उपक्रम हाती घेतला. या प्रकल्पासाठी मदत केलेल्या लोकप्रतिनिधींचे आभार मानून हा पार्क सांगलीच्या वैभवात भर घालणारा आहे, असे प्रतिपादन माजी केंद्रीय मंत्री व विद्यमान खासदार शरद पवार यांनी केले.
रिलायन्स मॉल सांगली शेजारी उभारण्यात आलेल्या नाना-नानी पार्कचे लोकार्पण खासदार शरद पवार यांच्याहस्ते करण्यात आले आहे. त्यावेळी ते बोलत होते. यावेळी जलसंपदा व लाभक्षेत्र विकास मंत्री आणि सांगली जिल्ह्याचे पालकमंत्री जयंत पाटील, सहकार व पणन मंत्री बाळासाहेब पाटील, खासदार श्रीनिवास पाटील, महापौर दिग्वीजय सुर्यवंशी, आमदार विद्याताई चव्हाण, महानगरपालिका आयुक्त नितीन कापडणीस, जिल्हा नियोजन समितीचे सदस्य संजय बजाज, महानगरपालिकेचे पदाधिकारी, आजी व माजी नगरसेवक, नागरिक उपस्थित होते.
प्रास्ताविकात महापौर दिग्वीजय सुर्यवंशी यांनी नाना-नानी पार्क साठी अनेक लोकप्रतिनिधींनी मदत केल्याचे सांगून 1 कोटी 35 लाख रूपये खर्चून हा पार्क 27 गुंठे जागेत उभा केल्याचे सांगितले. तसेच या पार्कसाठी पालकमंत्री जयंत पाटील यांनी बांधकाम व इतर कामासाठी 51 लाख, खासदार वंदना चव्हाण यांनी हॉलच्या बांधकामासाठी 25 लाख, आमदार जगन्नाथ शिंदे यांनी नरगोला व ट्रॅकसाठी 10 लाख, आमदार विद्याताई चव्हाण यांनी ॲम्पी थिएटर व परगोलासाठी 10 लाख, आमदार ख्वाजा बॅगसो यांनी लाईट व्यवस्थेसाठी 5 लाख रूपयांचा निधी दिला असून कंपौंड वॉलसाठी डी.पी.डी.सी. निधी 34 लाख रूपये दिला असल्याचे सांगितले.
या पार्कमध्ये बहुउद्देशीय हॉल, उपासना केंद्र, योगासने व घ्यानधारणा केंद्र, ग्रंथालय व वाचनालय, ज्येष्ठ नागरिक विरूंगळा केंद्र अशा सोयीसुविंधा आहेत. यावेळी केपीटी मार्फत पालकमंत्री जयंत पाटील यांच्याकडे ई-रिक्षासाठी मदत देण्यात आली.
