मुंबई :
धरण बहाद्दर अजित पवारांचा जाहीर निषेध..! संभाजी महाराजांना धर्मवीर म्हणण्यास नकार देणाऱ्या अजित पवारांना पाकिस्तानात पाठवा, राजीनामा द्या, राजीनामा द्या, धरणवीर राजीनामा द्या…! अश्या घोषणा देत राज्याचे विरोधी पक्षनेते अजित पवार यांनी धर्मवीर छत्रपती संभाजी महाराजांविरोधात केलेल्या वक्तव्याच्या निषेधार्थ मुंबई भाजपाच्या पदाधिकाऱ्यांसह कार्यकर्त्यांनी मंगळवारी दादर पूर्व येथे ‘गोमुत्र पाजा’ आंदोलन केले. यापुढील काळातही मुंबईतील विविध भागात आंदोलने करण्याचा इशारा भाजपाच्या पदाधिकाऱ्यांनी यावेळी दिला.
विधानसभेतील विरोधी पक्षनेते अजित पवार यांनी छत्रपती संभाजी महाराज हे धर्मवीर नाहीत, असे वक्तव्य केले होते. त्याचा समाजाच्या सर्व स्तरांतून निषेध आणि संताप व्यक्त होत आहे. या पार्श्वभूमीवर मुंबई भाजपा कार्यकर्त्यांनी आंदोलन करत अजित पवार यांचा तीव्र निषेध केला. यावेळी कार्यकर्त्यांनी अजित पवार यांच्या निषेधाच्या घोषणा दिल्या. छत्रपती संभाजी महाराजांनी नरकयातना भोगूनही धर्मांतर केले नव्हते. त्यांनी हिंदू धर्माच्या रक्षणासाठी कार्य केले होते. त्यामुळे अजित पवार यांचे वक्तव्य निंदनीय आहे, असे भाजपा जिल्हाध्यक्ष राजेश शिरवडकर यांनी सांगितले.
या आंदोलनात माजी नगरसेविका नेहल शहा, राजेश्री शिरवडकर, महादेव शिवगण, राजेश्री पालंडे, निर्मला सिंग, अजित सिंग, श्रीनिवास शुक्ला, निरज उभारे, विलास आंबेकर, विजय डगरे, बबलू पांचाळ, राहूल वाळंज, संतोष गुप्ता, अक्षता तेंडुलकर, गोवर्धन चौहान सहभागी झाले होते.
