पुणे : महावितरण कंपनीच्या रास्तापेठ येथील प्रशासकीय कार्यालयातील एका कक्षाला मंगळवारी (दि. 26) किरकोळ आग लागली. यात प्रशासकीय कागदपत्रांचे कोणतेही नुकसान झाले नाही. तर टेबल, संगणक, एसी ब्लोअर व खूर्ची इत्यादी साहित्य किरकोळ स्वरुपात जळाले.
याबाबत माहिती अशी, की रास्तापेठ येथील प्रशासकीय इमारतीमधील रास्तापेठ मंडलचे अधीक्षक अभियंता यांच्या केबिनमधून आज सकाळी 8 वाजताच्या सुमारास धूर निघत असल्याचे निदर्शनास आले. याबाबत तातडीने अग्निशामक दलास कळविण्यात आले. अग्निशामक दलाने त्वरीत येऊन या कक्षामध्ये लागलेली किरकोळ आग विझविल्याने पुढील अनर्थ टळला. या आगीमध्ये संगणक, टेबल, एसीचे दोन ब्लोअर इत्यादींचे सुमारे 70 हजार रुपयांचे नुकसान झाल्याचा प्राथमिक अंदाज आहे. मात्र कक्षातील टेबलवर प्रशासकीय कागदपत्र नव्हती. त्यामुळे कोणत्याही कागदपत्रांचे नुकसान झाले नाही. शॉर्टसर्कीटमुळे ही आग लागल्याची शक्यता आहे.