पुणे : वारंवार आवाहन करूनही वीजबिल भरण्यास टाळाटाळ करणाऱ्या पुणे परिमंडलातील घरगुती, वाणिज्यिक व औद्योगिक वर्गवारीतील 45 हजार 79 थकबाकीदारांचा वीजपुरवठा 18 कोटी 73 लाख रुपयांच्या थकबाकीपोटी गेल्या पंधरवड्यात खंडित करण्यात आला.
गुरुवारी (दि. 29) व शुक्रवारी (दि. 30) सार्वजनिक सुटीच्या दिवशी थकबाकीचा भरणा करता यावा यासाठी महावितरणचे अधिकृत वीजबिल भरणा केंद्र सुरु राहणार आहेत. थकबाकीदारांविरुद्ध सुरु असलेली ही मोहीम सुटीच्या दिवशी सुद्धा सुरु राहणार आहे. या मोहिमेत प्रादेशिक संचालक श्री. संजय ताकसांडे व मुख्य अभियंता श्री. एम. जी. शिंदे यांच्या मार्गदर्शनात अधीक्षक अभियंता, कार्यकारी अभियंता, सर्व उपविभाग व शाखा कार्यालयप्रमुख अभियंते, लेखा अधिकारी तसेच हजारो कर्मचारी सहभागी झाले आहेत.
गेल्या पंधरवड्यात पुणे शहरातील घरगुती, वाणिज्यिक व औद्योगिक 28 हजार 620 थकबाकीदारांचा वीजपुरवठा 8 कोटी 13 लाख रुपयांच्या थकबाकीमुळे खंडित करण्यात आला. भोसरी व पिंपरी विभागअंतर्गत पिंपरी चिंचवड शहरातील 8520 वीजग्राहकांकडे 5 कोटी 26 लाख रुपयांची थकबाकी असल्याने त्यांचाही वीजपुरवठा खंडित करण्यात आला. तसेच मुळशी, मंचर व राजगुरुनगर विभाग अंतर्गत मुळशी, जुन्नर, आंबेगाव, मावळ, खेड तालुक्यातील 7939 थकबाकीदारांचा वीजपुरवठा 5 कोटी 34 लाख रुपयांच्या थकबाकीमुळे खंडित करण्यात आला आहे.
थकबाकीमुळे तात्पुरता वीजपुरवठा खंडित झाल्यास थकबाकीच्या रकमेसह पुनर्जोडणी शुल्क (रिकनेक्शन चार्जेस) भरणे नियमानुसार आवश्यक असून त्यानंतरच संबंधीत थकबाकीदाराचा वीजपुरवठा पूर्ववत करण्यात येणार आहे. नियमानुसार लघुदाब वर्गवारीतील सिंगल फेजसाठी 50 रुपये तर थ्री फेज कनेक्शनसाठी 100 रुपये तर उच्चदाब वीजग्राहकांसाठी 500 रुपये पुनर्जोडणी शुल्क आहे. हे शुल्क भरण्यासाठी ऑनलाईन सोय उपलब्ध नसल्याने थकबाकीदारांनी थकीत रक्कम व पुनर्जोडणी शुल्क कार्यालयीन वेळेत भरून सहकार्य करण्याचे आवाहन महावितरणने केले आहे.
कटू कारवाई टाळा, सहकार्य करा – वीजपुरवठा खंडित करण्याची कटू कारवाई टाळण्यासाठी थकबाकीचा भरणा करून सहकार्य करावे, असे आवाहन महावितरणने केले आहे. थकबाकी व चालू वीजबिलांचा वीजग्राहकांना भरणा करता यावा म्हणून पुणे परिमंडलातील महावितरणचे सर्व अधिकृत स्थानिक वीजबिल भरणा केंद्र दि. 29 व 30 मार्चला सुटीच्या दिवशी सुरु राहणार आहेत. तसेच घरबसल्या ‘ऑनलाईन’ पेमेंटसाठी महावितरणची www.mahadiscom.in ही वेबसाईट तसेच मोबाईल अॅपचा पर्याय उपलब्ध आहे.