मुंबई: महावितरणमध्ये कार्यरत बाह्यस्त्रोत कर्मचाऱ्यांना मासिक वेतन निर्धारित वेळेत मिळावे यासाठी सर्व संबंधितांनी विविध अधिनियमांची प्रभावीपणे अंमलबजावणी करावी असे निर्देश महावितरणचे संचालक (वित्त) सुनिल पिंपळखुटे यांनी दिले असून या कामात हयगय करणाऱ्यांवर कठोर कारवाई करण्याचा इशाराही त्यांनी दिला आहे.
बाह्यस्त्रोत कर्मचाऱ्यांच्या विविध प्रश्नांबाबत बुधवारी (दि. 25 ऑक्टोबरला) महावितरणच्या प्रकाशगड मुख्यालयात बैठक झाली. या बैठकीत बाह्यस्त्रोत कर्मचाऱ्यांना मासिक वेतन निर्धारित वेळेत मिळावे यासाठी या प्रक्रियेशी निगडीत सर्व संबंधित विभागांनी दक्षता घ्यावी. ही सर्व कामे ऑनलाईन प्रक्रियेद्वारेच वेळेत पूर्ण करावीत. तसेच याकरिता प्रत्येक विभागाने करावयाच्या कामाची जबाबदारी निश्चित करून या प्रक्रियेत अधिक सूसत्रता व गती आणावी, असे निर्देश संचालक (वित्त) सुनिल पिंपळखुटे यांनी यावेळी दिले.