प्रादेशिक संचालक श्री. संजय ताकसांडे यांचा इशारा
पुणे, दि. 14 : वीजग्राहकांच्या मीटरचे हेतुपुरस्सर किंवा निष्काळजीपणे सदोष रिडींग घेणाऱ्या व वीजग्राहकांना विनाकारण मनस्ताप देणाऱ्या रिडींग एजन्सीजविरुद्ध प्रसंगी फौजदारी गुन्हा दाखल करण्याचे निर्देश महावितरणचे प्रादेशिक संचालक श्री. संजय ताकसांडे यांनी दिले.
मीटर रिडींग एजन्सीजने घेतलेल्या रिडींगचे त्याच दिवशी महावितरणकडून 5 टक्के तपासणी करून पर्यवेक्षण करण्यात येत असल्याचे त्यांनी सांगितले. येथील ‘प्रकाशभवन’मध्ये महावितरणचे वरिष्ठ अधिकारी व मीटर रिडींग एजन्सीजचे संचालक यांच्या नुकत्याच झालेल्या बैठकीत प्रादेशिक संचालक श्री. ताकसांडे बोलत होते. यावेळी पुणे परिमंडलाचे मुख्य अभियंता श्री. एम. जी. शिंदे उपस्थित होते.
प्रादेशिक संचालक श्री. संजय ताकसांडे म्हणाले, की महावितरणने मोबाईल अ‍ॅपद्वारे वीजमीटर रिडींगची प्रणाली विकसीत केली आहे. पूर्वीच्या तुलनेत मीटर रिडींगची पद्धती अधिक सोयीस्कर व सोपी झालेली आहे. रिडींगमध्ये अचूकताही आलेली आहे. परंतु मीटर रिडींग एजन्सीजद्वारे अनेक ठिकाणी सदोष रिडींग घेतले जात आहे. महावितरणचे अभियंते व कर्मचाऱ्यांकडून दररोज प्रत्यक्ष 5 टक्के मीटर रिंडीगची तपासणी करून एजन्सीजने घेतलेल्या रिडींगचे पर्यवेक्षण सुरु अाहे. त्यातून हा प्रकार दिसून येत आहे. सदोष मीटर रिडींग घेतल्यामुळे महावितरणच्या महसुलाचे नुकसान होते. याशिवाय वीजबिल दुरुस्तीचा ग्राहकांनाही मनस्ताप व त्रास सहन करावा लागत आहे. यापुढे सदोष मीटर रिडींग चालू राहिल्यास संबंधित मीटर रिडींग एजन्सीविरुद्ध आर्थिक दंड, काळ्या यादीत टाकणे यासोबतच फौजदारी कारवाई करण्याचे निर्देश प्रादेशिक संचालक श्री. ताकसांडे यांनी दिले. याशिवाय महावितरणच्या अधिकार्‍यांची व कर्मचाऱ्यांनी यात हयगय व निष्काळजीपणा दिसून आल्यास त्यांच्याविरुद्ध कारवाई करण्याचे निर्देश त्यांनी यावेळी दिले.
वीजग्राहकांना अचूक मीटर रिडींगचे वीजबिल देणे ही महावितरणची जबाबदारी आहे. अत्याधुनिक तंत्रज्ञानाद्वारे मीटर रिडींगची सोय उपलब्ध असताना केवळ मीटर रिडींग एजन्सीजच्या कामचुकार किंवा निष्काळजीपणामुळे वीजग्राहकांना होणारा मनस्ताप सहन केला जाणार नाही. सदोष मीटर रिडींगकडे महावितरणचे पूर्ण लक्ष आहे. रिडींग एजन्सीजने या कामात ताबडतोब सुधारणा करावी अन्यथा महावितरणच्या महसुलाशी खेळ करणार्‍या संबंधित एजन्सीविरुद्ध थेट फौजदारी गुन्हे दाखल करण्यात येतील, असे प्रादेशिक संचालक श्री. ताकसांडे यांनी बजावले.
या बैठकीत अधीक्षक अभियंता सर्वश्री सुंदर लटपटे, महेंद्र दिवाकर, राजेंद्र पवार यांच्यासह कार्यकारी अभियंते, उपविभाग कार्यालय प्रमुख, मीटर रिडींग एजन्सींजचे संचालक आदींची उपस्थिती होती.
