‘विद्यार्थ्यांच्या प्रश्नांवर राजकीय स्कोअर करू नका’; सभागृह नेते गणेश बिडकर यांच्याकडूनही बंदच्या इशाऱ्यावर टीका
पुणे : MPSC विद्यार्थ्यांच्या आंदोलनाच्या पार्श्वभूमीवर ‘पुणे बंद’चा इशारा दिल्यानंतर शहरातील राजकीय वातावरण आणखी तापले आहे. पुण्याच्या महापौर मंजुषा नागपुरे यांनी आमदार रोहित पवार यांना थेट आव्हान देत, “पुणे शहर बंद करून दाखवावे; पुणेकर त्यांना त्यांची जागा दाखवतील,” अशी भूमिका मांडली. विद्यार्थ्यांच्या मागण्या मांडण्याचा अधिकार मान्य असला तरी शहरातील सर्वसामान्य नागरिक, रुग्ण, विद्यार्थी आणि दैनंदिन व्यवहार वेठीस धरण्याचा अधिकार कोणालाही नसल्याचे त्यांनी स्पष्ट केले.
महापौर नागपुरे म्हणाल्या की, पुणे हे विद्येचे माहेरघर असून राज्यभरातून लाखो विद्यार्थी येथे शिक्षणासाठी येतात. शहराने विद्यार्थ्यांना कायम सामावून घेतले आहे. शिक्षणासाठी आलेल्या विद्यार्थ्यांनी आपले करिअर घडवावे आणि कोणत्याही पक्षाच्या राजकीय अजेंड्याचा भाग बनू नये, असे आवाहन त्यांनी केले.
‘पुणेकरांना त्रास होऊ देणार नाही’
पुणे बंद झाल्यास महाविद्यालयीन विद्यार्थ्यांचे प्रवास, रुग्णालयात जाणारे रुग्ण, नोकरदार आणि सर्वसामान्य नागरिक यांना फटका बसेल, असे नागपुरे यांनी नमूद केले. “विद्यार्थ्यांना आपली भूमिका मांडण्याचा आणि मागण्या करण्याचा पूर्ण अधिकार आहे; मात्र पुणेकरांना कुठलाही त्रास होता कामा नये,” असेही त्यांनी सांगितले.
रोहित पवार यांनी MPSC अध्यक्ष विवेक भीमनवार यांच्या राजीनाम्याच्या मागणीवरून सरकारवर दबाव वाढवत, निर्णय न झाल्यास पुणे बंद करण्याचा इशारा दिला होता. भीमनवार यांनी मुख्यमंत्र्यांकडे राजीनामा पाठवल्याचा दावाही पवार यांनी केला आहे.
सभागृह नेते बिडकरांचाही विरोध
महापौरांसोबत पत्रकार परिषदेत उपस्थित असलेल्या सभागृह नेते गणेश बिडकर यांनीही विद्यार्थ्यांच्या प्रश्नांच्या नावाखाली पुणे शहर वेठीस धरण्याच्या भूमिकेला विरोध केला. विद्यार्थ्यांच्या मागण्यांवर चर्चा आणि संवाद व्हावा; मात्र शहरात भीतीचे वातावरण निर्माण करणे किंवा कायदा-सुव्यवस्थेचा प्रश्न निर्माण होईल अशी भाषा योग्य नसल्याची भूमिका त्यांनी मांडली.
विद्यार्थ्यांच्या प्रश्नांना राजकीय रंग देऊन पुणे बंद करण्याची धमकी देणे योग्य नाही, असा त्यांचा सूर होता. आंदोलन लोकशाही मार्गाने करावे आणि पुणेकरांच्या दैनंदिन जीवनावर परिणाम होईल अशी परिस्थिती निर्माण करू नये, असे त्यांनी सांगितले.
MPSC आंदोलनावरून राजकीय संघर्ष
पुण्यात MPSC अध्यक्षांच्या राजीनाम्यासह विविध मागण्यांसाठी गेल्या काही दिवसांपासून आंदोलन सुरू आहे. रोहित पवार यांच्या नेतृत्वाखालील आंदोलनाला विविध विरोधी पक्षांच्या नेत्यांनी भेट देऊन पाठिंबा दिला आहे. दुसरीकडे भाजप आणि सत्ताधारी पक्षांच्या नेत्यांनी आंदोलनाला राजकीय वळण दिल्याचा आरोप केला आहे.
मनोज जरांगे पाटील यांनीही आंदोलनाला भेट देऊन विद्यार्थ्यांच्या मागण्यांवर निर्णय न झाल्यास राज्यव्यापी आंदोलनाचा इशारा दिला आहे. त्यामुळे MPSC अध्यक्षांच्या राजीनाम्याचा प्रश्न आता केवळ विद्यार्थ्यांच्या आंदोलनापुरता मर्यादित न राहता मोठ्या राजकीय संघर्षात परिवर्तित होत आहे.
