मार्केटयार्ड पोलिसांच्या गंभीर गुन्ह्यातील वर्षभरापासून फरार आरोपीला गुन्हे शाखेकडून अटक

पुणे, दि. ६ : मार्केटयार्ड पोलीस ठाण्यात दाखल गंभीर गुन्ह्यात मागील एक वर्षापासून फरार असलेल्या आरोपीला पुणे शहर गुन्हे शाखेच्या युनिट-२ पथकाने कोंढवा परिसरातून अटक केली. आकाश किशोर नवगिरे (वय २७, रा. कानज कोंढवा रोड, म्हसोबा मंदिराजवळ, गल्ली नं. १, टिळेकरनगर, कोंढवा, पुणे) असे अटक करण्यात आलेल्या आरोपीचे नाव आहे.पोलिसांनी दिलेल्या माहितीनुसार, ५ ऑक्टोबर २०२६ रोजी पोलीस अंमलदार कुंदन शिंदे, महेश मंडलिक आणि आशिष यादव हे गुन्हे शाखा युनिट-२च्या हद्दीत पाहिजे आरोपींचा शोध घेत होते. त्यावेळी मार्केटयार्ड पोलीस ठाण्यात दाखल गु.र.नं. १८८/२०२५, भारतीय न्याय संहिता कलम ११८(२), ३(५) तसेच महाराष्ट्र पोलीस कायदा कलम ३७(१)(३) सह १३५ या गुन्ह्यातील पाहिजे आरोपी आकाश नवगिरे हा कोंढवा परिसरात असल्याची माहिती पोलीस अंमलदार कुंदन शिंदे यांना मिळाली.मिळालेल्या माहितीची खातरजमा करून गुन्हे शाखा युनिट-२च्या पथकाने कोंढवा परिसरात सापळा रचला. आकाश नवगिरे हा त्याच्या राहत्या घराजवळ असल्याचे आढळून आल्यानंतर पोलिसांनी त्याला ताब्यात घेतले. त्याच्याकडे गुन्ह्याबाबत चौकशी केली असता त्याने गुन्ह्यात सहभाग असल्याची कबुली दिल्याचे पोलिसांनी सांगितले.आकाश नवगिरे हा संबंधित गुन्ह्यात मागील एक वर्षापासून फरार होता. त्याला अटक करून पुढील तपास व कायदेशीर कारवाईसाठी मार्केटयार्ड पोलीस ठाण्याच्या ताब्यात देण्यात आले आहे.ही कारवाई अपर पोलीस आयुक्त (गुन्हे) तेजस्वी सातपुते, पोलीस उपायुक्त (गुन्हे) गौहर हसन आणि सहायक पोलीस आयुक्त शैलेश संखे यांच्या मार्गदर्शनाखाली वरिष्ठ पोलीस निरीक्षक राहुल खिलारे, पोलीस निरीक्षक अविनाश माने, पोलीस उपनिरीक्षक ज्ञानेश्वर दळवी, तसेच पोलीस अंमलदार कुंदन शिंदे, महेश मंडलिक, ओंकार कुंभार, शंकर कुंभार, योगेश मांढरे, उज्ज्वल मोकाशी, विजय पवार, संदीप शिर्के, संतोष टकले, सर्जेराव सरगर, शिवानंद कायगुडे, विद्या शिंदे आणि आशिष यादव यांच्या पथकाने केली.