AB फॉर्मही दिला; भाजपचे कौस्तुभ गावडे आधीच रिंगणात, महायुतीत उमेदवारीवरून पेच
पुणे : पुणे विभाग शिक्षक मतदारसंघाच्या विधान परिषद निवडणुकीत महायुतीतील मतभेद उघड होताना दिसत आहेत. शिवसेनेकडून मंगेश चिवटे हेच अधिकृत उमेदवार असतील आणि त्यांना पक्षाचा AB फॉर्म देण्यात आला आहे, अशी घोषणा उपमुख्यमंत्री एकनाथ शिंदे यांनी केली. दुसरीकडे भाजपने याच मतदारसंघातून कौस्तुभ गावडे यांना उमेदवारी दिली असून त्यांनी अर्जही दाखल केला आहे. त्यामुळे पुणे शिक्षक मतदारसंघात महायुतीतील अंतर्गत पेच वाढला आहे.
दिल्ली दौऱ्यावर असलेल्या शिंदे यांनी पंतप्रधान नरेंद्र मोदी यांची भेट घेतल्यानंतर माध्यमांशी संवाद साधताना चिवटे यांच्या उमेदवारीबाबत स्पष्ट भूमिका मांडली. “मंगेश चिवटे यांना AB फॉर्म दिला आहे आणि ते निवडणूक लढणारच,” असे शिंदे यांनी सांगितले. महायुतीतील जागावाटपाचा अंतिम निर्णय अद्याप झालेला नसल्याचेही त्यांनी स्पष्ट केले.
भाजप-शिवसेना आमनेसामने
भाजपने पुणे शिक्षक मतदारसंघासाठी कौस्तुभ गावडे यांना अधिकृत उमेदवारी दिली आहे. गावडे हे कोल्हापूरच्या श्री स्वामी विवेकानंद शिक्षण संस्थेचे मुख्य कार्यकारी अधिकारी आहेत. त्यांनी भाजपच्या प्रमुख नेत्यांच्या उपस्थितीत उमेदवारी अर्ज दाखल केला आहे.
त्याचवेळी शिवसेनेने मंगेश चिवटे यांच्यावर ठाम राहण्याचा निर्णय घेतल्याने या जागेवर महायुतीतील दोन घटक पक्षांचे उमेदवार समोरासमोर येण्याची स्थिती निर्माण झाली आहे.
जागावाटपाचा निर्णय अद्याप बाकी
एकनाथ शिंदे यांनी या जागेबाबत मुख्यमंत्री देवेंद्र फडणवीस आणि उपमुख्यमंत्री सुनेत्रा पवार यांच्यासोबत चर्चा झाल्याचे सांगितले. मात्र महायुतीच्या पातळीवर अंतिम निर्णय अजून झालेला नाही. अर्ज मागे घेण्याच्या मुदतीपर्यंत या जागेबाबत तोडगा निघतो का, याकडे आता लक्ष लागले आहे.
दरम्यान, पुणे पदवीधर मतदारसंघासाठी भाजपकडून डॉ. स्मिता जाधव यांना उमेदवारी देण्यात आली आहे. शिवसेनेकडून त्या जागेसाठी सचिन सानप यांनी अर्ज दाखल केला आहे. त्यामुळे पदवीधर आणि शिक्षक या दोन्ही मतदारसंघांत महायुतीतील अंतर्गत स्पर्धा स्पष्ट झाली आहे.
शिंदे-मोदी भेटीत दुष्काळाचाही मुद्दा
दिल्लीतील भेटीत महाराष्ट्रातील दुष्काळी परिस्थिती, शेतकऱ्यांचे प्रश्न आणि केंद्राकडून अपेक्षित मदत याबाबतही चर्चा झाल्याचे शिंदे यांनी सांगितले. राज्यातील परिस्थितीची पाहणी करण्यासाठी केंद्राचे पथक येणार असल्याची माहितीही त्यांनी दिली.
