ए.आय.च्या युगातही चित्रकारांच्या रेषांचे महत्व कायम’ -प्रा. राहुल बोरावके
पुणे-कला क्षेत्रात मानाचे समजल्या जाणाऱ्या भारतीय कला प्रसारिणी सभा न्यासाकडून चालविल्या जाणाऱ्या पुण्यातील अभिनव कला महाविद्यालय टिळक पथच्या प्राचार्य पदी प्रा. राहुल बोरावके यांची नियुक्ती करण्यात आली आहे. दिनांक १ ऑक्टोबर २०२६ रोजी पासून त्यांची नियुक्ती करण्यात आलेली आहे. प्राचार्य पदाच्या नियुक्तीचे पत्र संस्थेचे सचिव पुष्कराज भालचंद्र पाठक यांनी त्यांना दिले. प्रा. राहुल अशोकराव बोरावके यांनी A.T.D., GD Art App., Dip E Ad हे सर्व शिक्षण अभिनव कला महाविद्यालय येथून पूर्ण केले असून MFA डॉ बाबासाहेब आंबेडकर विद्यापीठ संभाजीनगर येथून पूर्ण केलेले आहे.
या प्रसंगी सचिव पाठक म्हणाले, ‘विद्यार्थी हित केंद्रस्थानी ठेऊन प्रा. बोरावके त्यांचे काम करतील ही अपेक्षा आहे. या पूर्वी मुंबईतील जहांगीर आर्ट गॅलरीला, त्यांचे कला प्रदर्शन संपन्न झालेले आहे. विद्यार्थी प्रिय शिक्षक म्हणून अशी प्रा. बोरावके यांची ख्याती आहे, अनेक वर्ष त्यांनी अभिनव कला महाविद्यालयात विभाग प्रमुख पदाचे काम सक्षमपणे केले आहे. प्राचार्य पदी निवड झाल्याबद्दल कला क्षेत्रातून त्यांना शुभेच्छा दिल्या जात आहे.
प्रा. बोरावके म्हणाले, ‘माझे महाविद्यालयातील शिक्षण अभिनव कला मध्येच झाले आहे आणि आमच्याच महाविद्यालयात प्राचार्य पदी काम करण्याची मला संधी दिल्याबदद्दल सचिव पाठक आणि संस्था यांचा मी आभारी आहे. माझ्यासाठी नक्कीच हा भावनिक क्षण आहे. सध्याच्या ए.आय.च्या युगात देखील चित्रकारांच्या हातातील रेषांचे महत्व संपणार नाही असे त्यांनी म्हणताच विद्यार्थांनी टाळ्यांचा कडकडाट झाला.
