पुणे : बारामती तालुक्यातील शेरेवाडी (बाबुर्डी) गावात घराबाहेरील ओसरीत झोपलेल्या दोन वृद्ध महिलांची अज्ञात व्यक्तीने धारदार शस्त्राने गळा चिरून हत्या केल्याची धक्कादायक घटना सोमवारी मध्यरात्री घडली. इंदुमती मारुती लडकत (वय ७५) आणि कृष्णाबाई कुंडलिक लडकत (वय ६५) अशी मृत महिलांची नावे आहेत. मंगळवारी सकाळी हा प्रकार उघडकीस आला.
पोलिसांनी दिलेल्या माहितीनुसार, प्राथमिक तपासात दोन्ही महिलांच्या गळ्यातील सोन्याचे मंगळसूत्र गायब असल्याचे आढळून आले आहे. त्यामुळे चोरी अथवा लुटीच्या उद्देशातून हे दुहेरी हत्याकांड झाले असावे, असा पोलिसांचा प्राथमिक अंदाज आहे.
इंदुमती लडकत या शेरेवाडी येथील आपल्या घरी राहत होत्या. त्या बाबुर्डी गावच्या माजी सरपंच होत्या. त्यांना दोन मुले असून, एक मुलगा बारामती येथे ग्रामसेवक म्हणून कार्यरत आहे, तर दुसरा बंगळुरू येथे नोकरीला आहे. कृष्णाबाई लडकत या इंदुमती यांच्या शेजारी राहत होत्या. इंदुमती यांना रात्री सोबत मिळावी म्हणून कृष्णाबाई अनेकदा त्यांच्या घरी झोपण्यासाठी येत असत.
सोमवारी रात्रीही दोघी घराबाहेरील ओसरीत झोपल्या होत्या. मध्यरात्रीच्या सुमारास अज्ञात व्यक्तीने त्यांच्यावर धारदार शस्त्राने हल्ला करून गळा चिरला. या हल्ल्यात दोघींचा मृत्यू झाला. त्यांच्या गळ्यातील सोन्याचे मंगळसूत्र काढून नेण्यात आल्याचे प्राथमिक तपासात समोर आले आहे.
महिलांनी हल्लेखोराला प्रतिकार केला होता का, याचाही तपास पोलिसांकडून करण्यात येत आहे. घरातील दरवाजा आणि कपाटे उघडी आढळून आली असून, मंगळसूत्रांव्यतिरिक्त अन्य दागिने किंवा वस्तू चोरीला गेल्या आहेत का, याचीही पाहणी सुरू आहे.
घटनेची माहिती मिळताच सुपा पोलिस ठाण्याचे अधिकारी घटनास्थळी दाखल झाले. पुणे ग्रामीण पोलिस अधीक्षक संदीप सिंह गिल यांच्या मार्गदर्शनाखाली या दुहेरी हत्याकांडाचा तपास सुरू करण्यात आला आहे.
घटनास्थळी फॉरेन्सिक पथक, ठसे तज्ज्ञ आणि श्वान पथकाला पाचारण करण्यात आले. परिसरातील सीसीटीव्ही फुटेज, रात्री झालेली संशयितांची ये-जा तसेच घटनास्थळी मिळालेल्या पुराव्यांच्या आधारे आरोपीचा शोध सुरू आहे. कृष्णाबाई यांचा मुलगा शेती व्यवसाय करतो असून तोही घटनास्थळी उपस्थित होता.
या दुहेरी हत्याकांडामुळे शेरेवाडी आणि परिसरात खळबळ उडाली आहे.
