DRDOच्या भविष्यातील मानवरहित विमानात इंजिन एकत्रीकरणाची शक्यता तपासणार; ‘आत्मनिर्भर भारत’ मोहिमेला बळ
नवी दिल्ली : भारताच्या संरक्षण संशोधन आणि विकास संस्थेने विकसित केलेल्या **हाय-अल्टिट्यूड, लाँग-एंड्युरन्स (HALE) मानवरहित हवाई वाहनासाठी प्रगत टर्बोप्रॉप इंजिनच्या वापराची शक्यता तपासण्यासाठी भारत फोर्ज लिमिटेड आणि प्रॅट अँड व्हिटनी कॅनडा यांनी सहकार्य करण्याचा निर्णय घेतला आहे. प्रॅट अँड व्हिटनी हा RTX समूहाचा व्यवसाय विभाग आहे.
या सहकार्याअंतर्गत प्रॅट अँड व्हिटनी कॅनडा प्रस्तावित इंजिनची सुसंगतता, कार्यक्षमता आणि विमानात बसविण्यासाठी आवश्यक तांत्रिक बाबींचे मूल्यांकन करणार आहे. तर भारत फोर्ज आपल्या अभियांत्रिकी, उत्पादन आणि एरोस्पेस प्रणाली क्षेत्रातील क्षमतांचा वापर करून इंजिन आणि एअरफ्रेम यांच्यातील एकत्रीकरण, इंस्टॉलेशन डिझाइन आणि सिस्टीम इंटरफेस या कामांचे नेतृत्व करणार आहे.
हे सहकार्य केंद्र सरकारच्या ‘आत्मनिर्भर भारत’ मोहिमेअंतर्गत स्वदेशी मानवरहित हवाई प्रणाली विकसित करण्याच्या प्रयत्नांना चालना देणारे मानले जात आहे. मात्र, या टप्प्यावर एखाद्या विशिष्ट इंजिनची अंतिम निवड झालेली नसून, संबंधित टर्बोप्रॉप इंजिन पर्याय HALE UAVसाठी कितपत उपयुक्त ठरू शकतात याचे मूल्यांकन केले जाणार आहे.
भारत फोर्ज लिमिटेडचे उपाध्यक्ष आणि संयुक्त व्यवस्थापकीय संचालक अमित कल्याणी यांनी सांगितले की, भारताच्या स्वदेशी एरोस्पेस आणि संरक्षण उत्पादन क्षमतांना चालना देण्यासाठी प्रॅट अँड व्हिटनी कॅनडासोबतचे हे सहकार्य महत्त्वाचे आहे. जागतिक स्तरावर सिद्ध झालेल्या प्रॉपल्शन तंत्रज्ञानाला भारत फोर्जच्या अभियांत्रिकी आणि प्रणाली एकीकरण क्षमतेची जोड देऊन भारताच्या सामरिक आत्मनिर्भरतेला आणि संरक्षण सज्जतेला बळ देण्याचा प्रयत्न केला जाणार असल्याचे त्यांनी नमूद केले.
प्रॅट अँड व्हिटनीचे उपाध्यक्ष आणि भारतातील प्रमुख आशिष सराफ यांनीही भारताच्या एरोस्पेस आणि संरक्षण क्षेत्रातील महत्त्वाकांक्षांना पाठिंबा देण्याच्या कंपनीच्या वचनबद्धतेचा पुनरुच्चार केला. आव्हानात्मक कार्यपरिस्थितीत टर्बोप्रॉप इंजिनच्या विश्वासार्हतेचा अनुभव HALE कार्यक्रमासाठी उपयुक्त ठरू शकतो, असे त्यांनी सांगितले.
HALE UAV प्रकारातील मानवरहित विमाने अधिक उंचीवर दीर्घकाळ उड्डाण करण्यासाठी विकसित केली जातात. जमीन आणि सागरी क्षेत्रातील दीर्घकालीन पाळत, गुप्तचर माहिती संकलन आणि टेहळणी यांसारख्या मोहिमांसाठी त्यांचा वापर केला जाऊ शकतो.
भारत फोर्ज आणि प्रॅट अँड व्हिटनी कॅनडाच्या या सहकार्यामुळे भविष्यातील स्वदेशी HALE प्लॅटफॉर्मसाठी आवश्यक प्रॉपल्शन प्रणालीच्या तांत्रिक पर्यायांचे मूल्यांकन करण्यास मदत होणार आहे.
