पुणे रेल्वे स्थानक परिसरात प्रकार; पोलीस शिपाई अक्षय बांबल गंभीर जखमी
पुणे :
पुणे रेल्वे स्थानक परिसरात पोलीस कर्मचाऱ्यावर जीवघेणा हल्ला झाल्याची धक्कादायक घटना समोर आली आहे. रेल्वे रुळांवर गांजा पिणाऱ्या काही जणांना हटकल्यानंतर त्यांनी पोलीस शिपाई अक्षय बांबल यांच्यावर कोयत्याने हल्ला केल्याची प्राथमिक माहिती आहे. या हल्ल्यात बांबल गंभीर जखमी झाले असून त्यांच्यावर उपचार सुरू आहेत.
मिळालेल्या प्राथमिक माहितीनुसार, पोलीस शिपाई अक्षय बांबल हे पुणे रेल्वे स्थानक परिसरात कर्तव्यावर होते. त्यावेळी रेल्वे रुळांजवळ काही जण गांजा पित असल्याचे त्यांच्या निदर्शनास आले. बांबल यांनी संबंधितांना हटकले असता, त्या टोळक्याने संतापून त्यांच्यावर हल्ला केला.
यावेळी आरोपींनी धारदार कोयत्याने अक्षय बांबल यांच्या गळ्यावर वार केल्याचे सांगितले जात आहे. या हल्ल्यात ते गंभीर जखमी झाले. घटनेनंतर परिसरात एकच खळबळ उडाली असून, पोलीस कर्मचाऱ्यावरच झालेल्या या जीवघेण्या हल्ल्यामुळे कायदा-सुव्यवस्थेबाबत चिंता व्यक्त होत आहे.
या प्रकरणात हल्लेखोरांची संख्या नेमकी किती होती, तसेच त्यापैकी किती जणांना ताब्यात घेण्यात आले आहे, याबाबतची अधिकृत माहिती अद्याप समोर आलेली नाही. पोलिसांकडून पुढील तपास सुरू आहे.
