युरोप आणि उत्तर अमेरिकेतील बाजारपेठांवर लक्ष; १८ ते ४१.२ किलोवॅट पॉवर क्षमतेची इंजिन मालिका
पुणे : किर्लोस्कर ऑइल इंजिन्स लिमिटेड (केओईएल) आणि जर्मनीतील ड्युट्झ या कंपन्यांनी १.६ लिटर कॉम्पॅक्ट इंजिन प्लॅटफॉर्मसाठी धोरणात्मक भागीदारी केली आहे. या सहकार्याच्या माध्यमातून केओईएल आपल्या कॉम्पॅक्ट इंजिन सोल्युशन्सचा विस्तार युरोप आणि उत्तर अमेरिकेतील बाजारपेठांमध्ये करणार आहे.
या भागीदारीत किर्लोस्कर ऑइल इंजिन्सची अभियांत्रिकी क्षमता आणि मोठ्या प्रमाणावरील उत्पादनाचा अनुभव यांची सांगड ड्युट्झच्या आंतरराष्ट्रीय विक्री आणि सेवा नेटवर्कशी घातली जाणार आहे. २ लिटरपेक्षा कमी क्षमतेच्या इंजिन विभागात जागतिक स्तरावर कंपनीचे अस्तित्व अधिक मजबूत करण्याचा यामागील उद्देश आहे.
नवीन आर५५० प्लॅटफॉर्म नॅचरल्ली अॅस्पिरेटेड तसेच टर्बोचार्ज्ड अशा दोन्ही प्रकारांत उपलब्ध असेल. वॉटर-कूल्ड तीन-सिलिंडर इंजिनच्या या मालिकेत इलेक्ट्रॉनिक डायरेक्ट इंजेक्शन आणि हाय-प्रेशर कॉमन-रेल तंत्रज्ञानाचा वापर करण्यात आला आहे.
ही इंजिने १८ ते ४१.२ किलोवॅट पॉवर क्षमता देणार असून बांधकाम, मटेरियल हँडलिंग आणि औद्योगिक यंत्रसामग्रीसाठी त्यांचा वापर करता येणार आहे. कॉम्पॅक्ट आकार, कार्यक्षम ज्वलन प्रक्रिया आणि विविध यंत्रणांमध्ये सहज समाविष्ट करता येण्याची क्षमता ही या इंजिनांची वैशिष्ट्ये असल्याचे कंपनीने म्हटले आहे.
या इंजिन मालिकेची रचना युरोपियन युनियनच्या स्टेज व्ही तसेच अमेरिकेतील ईपीए आणि सीएआरबी टियर ४ उत्सर्जन मानकांनुसार करण्यात आली आहे.
किर्लोस्कर ऑइल इंजिन्सच्या ग्लोबल इंडस्ट्रियल बिझनेसचे अध्यक्ष अनमोल बत्रा यांनी सांगितले की, ड्युट्झ आणि किर्लोस्कर ऑइल इंजिन्स यांच्यात अनेक वर्षांपासून औद्योगिक सहकार्य आहे. नव्या करारामुळे ही भागीदारी अधिक मजबूत होणार असून जागतिक स्तरावर कॉम्पॅक्ट ड्राइव्ह सोल्युशन्सचा विस्तार करता येईल.
ड्युट्झ इंजिन्स बिझनेस युनिटचे मुख्य कार्यकारी अधिकारी मार्कस विलिंगर यांनी सांगितले की, १.६ लिटर इंजिनमुळे कमी पॉवर क्षमतेच्या विभागात कॉम्पॅक्ट आणि उच्च कार्यक्षमतेचा पर्याय उपलब्ध होणार आहे. ड्युट्झच्या जागतिक सेवा नेटवर्कमुळे ग्राहकांना सुटे भाग, तांत्रिक सहाय्य आणि वापराच्या संपूर्ण कालावधीत आवश्यक सेवा उपलब्ध करून देता येणार आहेत.
या सहकार्यामुळे किर्लोस्कर ऑइल इंजिन्सचा पॉवरजेन, औद्योगिक, कृषी आणि पायाभूत सुविधा क्षेत्रातील अनुभव तसेच ड्युट्झचे जागतिक नेटवर्क आणि ड्राइव्ह सिस्टिममधील कौशल्य एकत्र येणार आहे.
