विमान कर्मचाऱ्यांच्या कथित मुजोर वर्तनाचीही तक्रार; भरपाईसह कारवाईची मागणी
पुणे : विमानाच्या वेळेत वारंवार बदल आणि विमान कंपनीच्या कर्मचाऱ्यांच्या कथित गैरवर्तनाचा फटका पुण्यातील प्रवाशांना बसल्याचा प्रकार समोर आला आहे. दिल्लीहून पुण्याला येणाऱ्या स्पाइसजेटच्या ‘एसजी ९३९’ विमानाची वेळ वारंवार पुढे ढकलण्यात आल्याने प्रवाशांना रात्रभर दिल्लीत अडकून राहावे लागले. यामुळे हॉटेल, जेवण आणि प्रवासापोटी सुमारे १२ हजार ४०० रुपयांचा अतिरिक्त खर्च सहन करावा लागल्याची तक्रार करण्यात आली आहे.
सोमवारी (ता. ३१ ऑगस्ट) दिल्लीहून पुण्याकडे येणारे हे विमान सायंकाळी ४.५५ वाजता उड्डाण करणार होते. मात्र, त्यानंतर विमानाची वेळ वारंवार बदलण्यात आल्याचा प्रवाशांचा आरोप आहे. सुरुवातीला पहाटे ४ वाजता, त्यानंतर ६ वाजता, ८.३० आणि अखेर ९.३० वाजेपर्यंत वेळ पुढे ढकलण्यात आल्याने प्रवाशांना मोठा मनःस्ताप सहन करावा लागला.
सामानाच्या वजनावरून वाद
दरम्यान, १ सप्टेंबर रोजी दिल्ली विमानतळावर चेक-इन करताना सामानाच्या वजनावरूनही वाद झाल्याचे प्रवाशांनी म्हटले आहे. लेह येथून तेच सामान घेऊन प्रवास केल्याचे सांगूनही उपस्थित वरिष्ठ अधिकाऱ्याने अयोग्य आणि अपमानास्पद भाषा वापरल्याचा आरोप करण्यात आला आहे.
‘फालतू माणसे’ असा उल्लेख करत ‘तिकीट लॉक करून कसे जाता ते पाहतो’ अशा शब्दांत धमकी दिल्याचा आरोपही प्रवाशांनी आपल्या तक्रारीत केला आहे. या आरोपांबाबत संबंधित विमान कंपनीची अधिकृत भूमिका समोर आलेली नाही.
नुकसानभरपाईची मागणी
या संपूर्ण प्रकाराबाबत प्रवासी अॅड. सतीश गोरडे आणि अॅड. सायली गोरडे यांनी तक्रार दाखल केली असून, झालेल्या अतिरिक्त खर्चाची परतफेड, नुकसानभरपाई तसेच संबंधित अधिकाऱ्यावर प्रशासकीय कारवाई करण्याची मागणी केली आहे.
मागण्यांवर योग्य कार्यवाही न झाल्यास ग्राहक न्यायालयात दाद मागण्याचा इशाराही त्यांनी दिला आहे.
