पुणे- पुणे विमानतळाच्या आवारात खाजगी वाहनांना निर्बंध घालून प्रवासी वाहनांच्या मार्फत काही टोळकी प्रवाश्यांची लुटमार करत असल्याच्या तक्रारी ज्येष्ठ पत्रकारांनी आरटीओ, तसेच रिक्षाचालक संघटनेचे नितीन पवार यांच्याकडे केली होती पण या कडे हा प्राधिकरणाच्या आवारातील प्रश्न आहे असे त्यांनी स्पष्ट केले आणि वेळीच केंद्रीय राज्यमंत्री मुरलीधर मोहोळ यांच्याकडे तक्रार केल्यावर त्यांनी याकडे सरार्स दुर्लक्ष केले होते आता याच पार्श्वभूमीवर स्वाभिमानी शेतकरी संघटनेचे नेते राजू शेट्टी यांनी पुणे विमानतळ प्राधिकरणावर गंभीर आरोप केले आहेत. त्यांच्या मते, विमानतळावर प्रवाशांना घेण्यासाठी येणाऱ्या ओला, उबरसह इतर टॅक्सी वाहनांकडून अतिरिक्त शुल्क आकारले जाते. यामुळे दररोज १२ ते १५ लाख रुपयांची जादा वसुली होत असल्याचा दावा त्यांनी केला आहे.
शेट्टी यांनी त्यांचा अनुभव सांगितला. दिल्लीहून रात्री दोन वाजता पुणे विमानतळावर आल्यावर त्यांनी टॅक्सी बुक केली. विमानतळापासून शासकीय विश्रामगृहापर्यंतचे ऑनलाइन भाडे ३५० ते ३७५ रुपये होते. मात्र, विमानतळाच्या गेटवरून टॅक्सीने प्रवाशाला घेऊन जाण्यासाठी ६५० रुपये द्यावे लागले. चौकशी केल्यावर त्यांना समजले की, गेटवरून प्रवासी घेतल्यास अतिरिक्त शुल्क लागते. हे शुल्क टाळण्यासाठी विमानतळापासून ६०० मीटर दूर असलेल्या एरोमॉलमध्ये जावे लागते.
प्रवाशांकडे सामान आणि बॅगा असल्याने रात्रीच्या वेळी ६०० मीटर चालत जाणे अनेकांना शक्य नसते. त्यामुळे प्रवाशांना नाईलाजाने हे अतिरिक्त शुल्क भरावे लागते, असे शेट्टी म्हणाले. त्यांच्या माहितीनुसार, ६५० रुपयांच्या भाड्यात ३७५ रुपये टॅक्सी कंपनीचे मूळ भाडे असते, तर २७५ रुपये टर्मिनल शुल्क असते. यातून ओला, उबर किंवा इतर कंपन्या २५ ते ३० टक्के कमिशन घेतात. इंधन, वाहन देखभाल, कर्जाचा हप्ता आणि चालकाचा खर्च वजा केल्यावर टॅक्सीचालकाच्या हातात खूप कमी पैसे उरतात.
या संपूर्ण व्यवस्थेत मोठी मक्तेदारी तयार झाली असून प्रवासी आणि टॅक्सी व्यावसायिकांची आर्थिक पिळवणूक होत असल्याचा आरोप शेट्टी यांनी केला. या कंत्राटांमध्ये काही राजकीय नेते, लोकप्रतिनिधी आणि अधिकारी सहभागी असल्याचा गंभीर आरोपही त्यांनी केला. मात्र, त्यांनी या आरोपांचे कोणतेही पुरावे सार्वजनिक केलेले नाहीत. विमानतळ प्राधिकरणाने या शुल्काबाबत पारदर्शक माहिती जाहीर करून प्रवाशांना दिलासा द्यावा, अशी अपेक्षाही त्यांनी व्यक्त केली आहे.
