वेफर्स, नूडल्स, सूप, मेयोनिजसह शीतपेयांच्या कॅन्सचा साठा; तुर्भेतील ‘साधना एंटरप्रायझेस’वर कारवाई
नवी मुंबई : नामांकित कंपन्यांच्या खाद्यपदार्थांची मुदत संपल्यानंतर त्यांच्या पॅकिंगवरील एक्स्पायरी तारीख बदलून ते पुन्हा बाजारात विक्रीसाठी पाठविण्याचा धक्कादायक प्रकार नवी मुंबईतील तुर्भे येथे उघडकीस आला आहे. अन्न व औषध प्रशासन (FDA) आणि नवी मुंबई पोलिसांच्या गुन्हे शाखेने संयुक्त कारवाई करत या रॅकेटचा पर्दाफाश केला असून, तब्बल 76 लाख रुपयांहून अधिक किमतीचा मुदत संपलेला खाद्यपदार्थांचा साठा जप्त करण्यात आला आहे.
एफडीए आणि नवी मुंबई पोलिसांच्या गुन्हे शाखेने 24 ते 29 ऑगस्टदरम्यान तुर्भे येथील ‘मेसर्स साधना एंटरप्रायझेस’ येथे कारवाई केली. तपासणीदरम्यान मुंबई, नवी दिल्ली आणि नोएडा येथील सुमारे 10 प्रमुख निर्यातदार कंपन्यांच्या विविध खाद्यपदार्थांचा साठा या ठिकाणी आढळून आला.
या उत्पादनांची मुदत संपल्यानंतर त्यांच्या लेबलवरील तारीख बदलणे तसेच पॅकिंगमध्ये फेरफार करून ते पुन्हा विक्रीसाठी तयार केले जात असल्याचे तपासात समोर आले. ग्राहकांच्या आरोग्याला गंभीर धोका निर्माण करणाऱ्या या प्रकारामुळे अधिकाऱ्यांनी मोठ्या प्रमाणावर माल जप्त केला.
4,942 बॉक्स जप्त
कारवाईदरम्यान अधिकाऱ्यांनी 75 लाख 21 हजार 269 रुपये किमतीचे तब्बल 4,942 बॉक्स खाद्यपदार्थ जप्त केले. याशिवाय 1 लाख 30 हजार 600 रुपये किमतीचा लेबल नसलेला तसेच मुदत संपलेला अतिरिक्त माल हस्तगत करण्यात आला.
जप्त करण्यात आलेल्या मालामध्ये विशेषतः वेफर्स, बटाटा चिप्स, लोकप्रिय ब्रँडचे नूडल्स, सूप, मेयोनिजची पाकिटे तसेच विविध शीतपेयांच्या कॅन्सचा मोठ्या प्रमाणावर समावेश असल्याचे समोर आले आहे.
लहान मुलांसह सर्वच वयोगटातील ग्राहकांकडून मोठ्या प्रमाणावर वापरल्या जाणाऱ्या खाद्यपदार्थांच्या एक्स्पायरी तारखांमध्ये फेरफार होत असल्याचे समोर आल्याने या कारवाईचे गांभीर्य वाढले आहे.
या प्रकरणी भारतीय न्याय संहिता तसेच अन्न सुरक्षा आणि मानके कायद्यातील संबंधित तरतुदींनुसार तुर्भे पोलिस ठाण्यात गुन्हा दाखल करण्यात आला असून, या साखळीत आणखी कोणाचा सहभाग आहे आणि असा माल कुठे-कुठे विक्रीसाठी पाठविण्यात आला होता, याचा पुढील तपास सुरू आहे.
