ध्वनी प्रदूषणावरून महापौरांवर ‘आप’चा निशाणा
“कार्यकर्त्यांना पाठीशी घालण्याऐवजी कायद्याची अंमलबजावणी करा”; डीजे-डॉल्बीच्या कर्णकर्कश आवाजाला विरोध करणाऱ्या पुणेकरांच्या मागणीला आम आदमी पार्टीचा पाठिंबा
पुणे : गणेशोत्सवातील डीजे, डॉल्बी आणि कर्णकर्कश ध्वनीवर्धकांच्या वापरावरून पुण्यातील वातावरण तापू लागले आहे. ध्वनी प्रदूषणाविरोधात रविवारी नागरिकांनी आंदोलन केल्यानंतर आता आम आदमी पार्टीनेही या मुद्द्यावर आपली भूमिका स्पष्ट केली आहे. “ध्वनीच्या तीव्रतेचा त्रास पुणेकरांना होऊ न देणे ही महापौरांची जबाबदारी आहे; मात्र त्या कार्यकर्त्यांना पाठीशी घालत आहेत,” असा आरोप ‘आप’चे राज्य प्रवक्ते मुकुंद किर्दत यांनी केला आहे.
गेल्या काही वर्षांपासून विविध सण-उत्सवांच्या मिरवणुकांमध्ये मोठ्या आणि कर्णकर्कश आवाजातील ध्वनिवर्धकांवर निर्बंध घालण्याची मागणी पुणेकरांकडून होत असल्याचे ‘आप’ने म्हटले आहे. गणेश मंडळांसोबत झालेल्या बैठकीत प्रशासनाकडून या विषयावर स्पष्ट भूमिका अपेक्षित होती. कायद्याची अंमलबजावणी करण्याची जबाबदारी प्रशासनावर असल्याचे पक्षाने नमूद केले.
महापौर मंजुषा नागपुरे यांनी सोशल मीडियावर मांडलेल्या भूमिकेवरही ‘आप’ने आक्षेप घेतला आहे. “लोकप्रतिनिधींनी कार्यकर्त्यांना पाठीशी घालण्याऐवजी सर्वसामान्य पुणेकरांच्या आरोग्याचा विचार करावा,” अशी भूमिका पक्षाने मांडली. कर्णकर्कश, आरोग्यास घातक आणि नियमबाह्य डीजे-डॉल्बीच्या वापराला विरोध करणाऱ्या नागरिकांच्या मागणीला आम आदमी पार्टीने पाठिंबा जाहीर केला आहे.
ध्वनी प्रदूषणासंदर्भात विविध क्षेत्रांसाठी कायद्याने कमाल ध्वनीमर्यादा निश्चित करण्यात आली असून त्यासंदर्भात न्यायालयीन आदेशही आहेत. त्यामुळे महापालिका आणि पोलीस प्रशासनाने नियमांची काटेकोर अंमलबजावणी करावी, अशी मागणी करण्यात आली आहे.
मोठ्या आवाजामुळे नागरिकांच्या आरोग्यावर विपरीत परिणाम होऊ शकतो. विशेषतः लहान मुले, ज्येष्ठ नागरिक आणि रुग्णांना त्याचा अधिक त्रास होतो. त्यामुळे उत्सवाचा आनंद साजरा करताना इतर नागरिकांच्या आरोग्याचा आणि शांततेच्या अधिकाराचाही विचार होणे आवश्यक असल्याचे पक्षाने म्हटले आहे.
“सर्व धर्मांचे सण उत्साहाने साजरे झाले पाहिजेत. मात्र त्यासाठी पारंपरिक वाद्ये आणि साधनांना प्राधान्य दिले पाहिजे. पुण्याचा गणेशोत्सव पाहण्यासाठी हजारो नागरिक शहरात येतात. ते सजावट, पारंपरिक वादन आणि सांस्कृतिक वातावरण अनुभवण्यासाठी येतात; मोठ्या डीजे-डॉल्बी किंवा अश्लील नृत्यांसाठी नाहीत,” असे मुकुंद किर्दत यांनी म्हटले
