सेफ्टी बेल्ट तुटल्याने दुर्घटना; माखन चोर दहीकाला उत्सवातील घटनेने गोविंदांच्या सुरक्षेचा प्रश्न पुन्हा ऐरणीवर
बदलापूर : दहीहंडी उत्सवात सातव्या थरावर चढलेल्या चिमुकल्या गोविंदाचा सेफ्टी बेल्ट अचानक तुटल्याने तो थेट खाली कोसळल्याची धक्कादायक घटना बदलापूरमध्ये घडली. चिमुकल्याला तातडीने उपचारासाठी नेण्यात आले. या घटनेमुळे काही काळ उपस्थितांमध्ये मोठी खळबळ उडाली.
बदलापूर येथे आयोजित ‘माखन चोर दहीकाला उत्सवा’त हा प्रकार घडला. दहीहंडी फोडण्यासाठी आलेल्या गोविंदा पथकाने सात थरांची मानवी मनोरे रचले होते. सातव्या थरावर पोहोचलेल्या चिमुकल्या गोविंदाने सलामी दिली. त्यानंतर हंडी फोडण्याची तयारी सुरू असतानाच त्याचा सेफ्टी बेल्ट तुटला आणि तो उंचावरून खाली कोसळला. अचानक घडलेल्या या घटनेने उपस्थितांच्या काळजाचा ठोका चुकला.
घटनेनंतर चिमुकल्याला तातडीने उपचारासाठी नेण्यात आले. मोठा अनर्थ टळला असला तरी त्याच्या प्रकृतीबाबत अधिकृत माहिती उपलब्ध झाल्यानंतरच नेमकी स्थिती स्पष्ट होईल. सेफ्टी बेल्ट नेमका कशामुळे तुटला, हेही अद्याप स्पष्ट झालेले नाही. आयोजकांकडून घटनेची माहिती घेतली जात आहे.
दहीहंडीमध्ये उंच मानवी मनोरे रचताना गोविंदांच्या सुरक्षेसाठी सेफ्टी बेल्ट, मॅट आणि इतर सुरक्षात्मक साधनांचा वापर केला जातो. मात्र या घटनेत सुरक्षेसाठी वापरण्यात आलेला बेल्टच तुटल्याने या साधनांची गुणवत्ता आणि तपासणीचा मुद्दा पुन्हा समोर आला आहे.
यंदा 5 सप्टेंबर रोजी दहीहंडी उत्सव साजरा होणार आहे. मुंबई, ठाण्यासह राज्यातील अनेक ठिकाणी मोठ्या दहीहंडींचे आयोजन केले जाते. लाखोंची बक्षिसे आणि अधिकाधिक थर लावण्याच्या स्पर्धेमुळे गोविंदांच्या सुरक्षेची पुरेशी खबरदारी घेण्याची गरज या घटनेनंतर पुन्हा अधोरेखित झाली आहे.
