“हा सत्ताधाऱ्यांचा किंवा विरोधकांचा नाही, जनतेच्या टॅक्सचा पैसा”; सुहास टिंगरे यांचा हल्लाबोल
पुणे, दि. २० : पुणे महापालिकेतील निधीवाटपावरून भाजप आणि राष्ट्रवादी काँग्रेसमधील संघर्ष आणखी तीव्र होण्याची चिन्हे आहेत. राष्ट्रवादी काँग्रेसचे नगरसेवक तथा स्थायी समिती सदस्य सुहास टिंगरे यांनी आपल्या प्रभाग क्रमांक २ ड मधील सुमारे १२ कोटी रुपयांचा विकासनिधी प्रभाग क्रमांक ३ मध्ये वर्गीकरण करून वळविण्यात आला आहे. “हा पैसा सत्ताधाऱ्यांचा किंवा विरोधकांचा नसून जनतेने भरलेल्या टॅक्सचा पैसा आहे,” अशी भूमिका टिंगरे यांनी पत्रकार परिषदेत मांडली.टिंगरे यांच्या प्रभागात नसलेले, अन्य प्रभागातून निवडून आलेले भाजपा नगसेवक संदीप बेलदरे आणि दादा कोद्रे यांनी टिंग रे यांच्या निधी कपातीचा .वर्गीकरणाचा प्रस्ताव दिला जो आज स्थायीच्या बैठकीत संमत झाला.
महापालिकेतील निधीवाटपावरून गेल्या काही दिवसांपासून सत्ताधारी भाजप आणि अजितदादांच्या राष्ट्रवादी काँग्रेसमध्ये हमरी तुमरी सुरू आहे.राज्यात एकत्रित सत्तेत असताना महापालिकेत विरोधात असलेले हे दोन्ही पक्ष आता आपसात खेचाखेची करत आहेत.भाजपा नेत्यांवर टीका केल्याने अजितदादांच्या राष्ट्रवादीतून निवडून आलेले बालवडकर यांच्या निधीत कपात केल्यावर आता टिंगरे यांच्या प्रभागातील निधीचा मुद्दाही पुढे आला आहे.
टिंगरे यांच्या म्हणण्यानुसार, प्रभाग क्रमांक २ ड मधील विकासकामांसाठी असलेला सुमारे १२ कोटी रुपयांचा निधी वर्गीकरणाद्वारे प्रभाग क्रमांक ३ मध्ये वळविण्यात आला. आपल्या प्रभागातील नागरिकांसाठी असलेला विकासनिधी दुसऱ्या प्रभागात वळविण्याच्या निर्णयावर त्यांनी आक्षेप घेतला.
“महापालिकेचा पैसा हा कोणत्याही राजकीय पक्षाचा नाही. तो पुणेकर नागरिकांनी भरलेल्या करातून जमा झालेला पैसा आहे. त्यामुळे सत्ताधारी आणि विरोधक असा भेद करून विकासनिधीकडे पाहणे योग्य नाही,” अशी भूमिका टिंगरे यांनी मांडली.
बालवडकर-टिंगरेंच्या प्रस्तावाची पार्श्वभूमी
या निधीवाटपाच्या वादाला कोथरूडमधील विकासकामांच्या चौकशीच्या प्रस्तावाचीही पार्श्वभूमी आहे. राष्ट्रवादी काँग्रेसचे स्थायी समिती सदस्य अमोल बालवडकर आणि सुहास टिंगरे यांनी कोथरूड विधानसभा मतदारसंघात आमदार निधी तसेच अन्य निधीतून झालेल्या काही विकासकामांचे विशेष लेखापरीक्षण आणि आवश्यकतेनुसार थर्ड पार्टी टेक्निकल ऑडिट करण्याची मागणी करणारा प्रस्ताव स्थायी समितीसमोर मांडला होता.
या प्रस्तावानंतर महापालिकेतील राजकीय वातावरण तापले. त्यानंतर बालवडकर यांच्या विकासनिधीचा मुद्दा सर्वसाधारण सभेत आला आणि आता टिंगरे यांच्या प्रभागातील निधीही दुसऱ्या प्रभागात वळविल्याचा दावा समोर आला आहे.
बिडकरांच्या पत्रामुळे वादाला नवे वळण
दरम्यान, भाजपचे सभागृह नेते गणेश बिडकर यांनी उपमुख्यमंत्री सुनेत्रा पवार यांना पत्र पाठवून अमोल बालवडकर आणि सुहास टिंगरे यांच्या भूमिकेबाबत तक्रार केली आहे. बालवडकर आणि टिंगरे यांनी भाजपच्या वरिष्ठ नेतृत्वावर टीका केल्याचा आक्षेप या पत्रातून घेण्यात आल्याचे वृत्त प्रसिद्ध झाले आहे.
यामुळे महापालिकेतील निधीवाटपाचा विषय आता केवळ प्रशासकीय न राहता राजकीय संघर्षाच्या केंद्रस्थानी आला आहे.
प्रभाग क्रमांक २ ड मधील सुमारे १२ कोटी रुपयांचा निधी नेमका कोणत्या कामांसाठी मंजूर होता, तो प्रभाग क्रमांक ३ मधील कोणत्या कामांकडे वर्ग करण्यात आला आणि प्रभाग २ ड मधील नियोजित विकासकामांसाठी आता निधी कसा उपलब्ध करून दिला जाणार, याबाबत महापालिका प्रशासनाकडून स्पष्टीकरण अपेक्षित आहे.
“विकासकामांसाठी असलेला पैसा कोणत्याही पक्षाचा नसून जनतेच्या करातून आलेला आहे,” या टिंगरे यांच्या भूमिकेमुळे पुणे महापालिकेतील भाजप-राष्ट्रवादी निधीवाटपाचा वाद रंगत चालला आहे.
