८ जणांना अटक
नियमबाह्य पद्धतीने बार सुरू असल्याचा आरोप; १.६७ लाखांची दारू, ७५ हजारांची साऊंड सिस्टीम जप्त
पुणे : विमानतळ पोलीस ठाण्याच्या हद्दीतील एरोस्पेस मॉलमधील ‘The House Commune Bar & Eatery’ येथे नियमबाह्य पद्धतीने व्यवसाय सुरू असल्याच्या आरोपावरून पुणे शहर पोलिसांच्या गुन्हे शाखेने पहाटे छापा टाकला. ही कारवाई ९ ऑगस्ट रोजी पहाटे सुमारे ३.२० वाजता करण्यात आली.
पोलिसांनी दिलेल्या माहितीनुसार, बार निर्धारित वेळेनंतरही सुरू असल्याचे निदर्शनास आल्यानंतर कारवाई करण्यात आली. यावेळी सुमारे १ लाख ६७ हजार रुपये किमतीची दारू आणि सुमारे ७५ हजार रुपये किमतीची साऊंड सिस्टीम जप्त करण्यात आली.
छाप्याच्या वेळी बारमध्ये एकूण ८९ ग्राहक उपस्थित होते. यामध्ये ६३ पुरुष आणि २६ महिलांचा समावेश होता. या प्रकरणात बारशी संबंधित आठ जणांना पोलिसांनी अटक केली आहे.
पोलिसांनी दिलेल्या माहितीनुसार अटक करण्यात आलेल्यांमध्ये सुमित रोहिदास गोटे, नूर हुसेन शेख, सोनाली विलास पंडित, मंगेश उत्तम धिमधीमे, अनिकेत निवृत्ती मांडकीकर, सुनीता जैन वर्मा, अनंत जगल गायकवाड आणि शाहनूर अमिनुद्दीन काझी यांचा समावेश आहे. संबंधितांविरुद्ध विमानतळ पोलीस ठाण्यात विविध कायद्यांन्वये गुन्हा दाखल करण्याची कारवाई करण्यात आली आहे.
नियमांचे उल्लंघन करून व्यवसाय सुरू ठेवल्याचा आरोप
पोलिसांच्या म्हणण्यानुसार, संबंधित आस्थापना नियमांचे उल्लंघन करून सुरू ठेवण्यात आली होती. त्यामुळे भारतीय न्याय संहिता, महाराष्ट्र दारूबंदी अधिनियम, महाराष्ट्र पोलीस अधिनियम तसेच संबंधित अन्य तरतुदींनुसार कारवाई करण्यात येत आहे.
ही कारवाई पुणे शहर गुन्हे शाखेच्या पथकाने केली. अपर पोलीस आयुक्त (गुन्हे) तेजस्वी सातपुते, पोलीस उपायुक्त (गुन्हे) गौहर हसन आणि सहायक पोलीस आयुक्त (गुन्हे-३) शंकर खटके यांच्या मार्गदर्शनाखाली गुन्हे शाखेच्या अधिकारी व कर्मचाऱ्यांनी कारवाई केली.
पहाटेपर्यंत सुरू असलेल्या बारवर पोलिसांचा बडगा
पुण्यातील बार आणि पब निर्धारित वेळेनंतर सुरू ठेवण्याच्या प्रकारांवर पोलिसांकडून कारवाई सुरू असतानाच ही कारवाई झाली आहे. पहाटेपर्यंत सुरू असलेल्या व्यावसायिक आस्थापनांविरोधात नियमांनुसार कारवाई केली जाईल, असा स्पष्ट संदेश या कारवाईतून देण्यात आला आहे.
