मुळशी धरण, पळसे धबधबा आणि नयनरम्य सेल्फी पॉईंटचा प्रवास; पुणेकरांना सुरक्षित व किफायतशीर पर्यटनाची संधी
पुणे, दि. ४ ऑगस्ट : पुणे महानगर परिवहन महामंडळाच्या वतीने पावसाळी पर्यटनाला चालना देण्यासाठी सुरू करण्यात आलेल्या मार्ग क्रमांक ९ (अ) ‘वर्षा सहल’ विशेष पर्यटन बस सेवेचे उद्घाटन मंगळवारी स्वारगेट बसस्थानक येथे महापौर मंजुषा नागपुरे यांच्या हस्ते करण्यात आले. यावेळी PMPMLचे संचालक अजय खेडेकर उपस्थित होते.
या विशेष बस सेवेमुळे पुणेकर आणि पर्यटकांना पावसाळ्यातील निसर्गसौंदर्याचा सुरक्षित आणि आरामदायी पद्धतीने आनंद घेता येणार आहे. या पर्यटन मार्गामध्ये मुळशी धरण, पळसे धबधबा तसेच नयनरम्य सेल्फी पॉईंटचा समावेश करण्यात आला आहे.
उद्घाटनप्रसंगी बोलताना महापौर मंजुषा नागपुरे म्हणाल्या, “PMPMLचा हा उपक्रम पुणेकर आणि पर्यटकांसाठी अत्यंत उपयुक्त आहे. सुरक्षित, किफायतशीर आणि नियोजनबद्ध पर्यटनाची संधी या सेवेमुळे उपलब्ध होणार असून पावसाळी पर्यटनाला निश्चितच चालना मिळेल.”
पुणे महानगरपालिकेतील सर्व महिला नगरसेविकांसाठीही या विशेष पर्यटन बस सेवेच्या माध्यमातून स्वतंत्र सहलीचे आयोजन करण्यात यावे, अशी सूचनाही महापौरांनी यावेळी केली.
PMPMLचे संचालक अजय खेडेकर यांनी महामंडळाच्या पर्यटन बस सेवेचे महत्त्व अधोरेखित केले. पावसाळ्यातील निसर्गरम्य पर्यटनस्थळांना भेट देण्यासाठी नागरिकांनी मोठ्या संख्येने या सेवेचा लाभ घ्यावा, असे आवाहन त्यांनी केले.
या कार्यक्रमाला वाहतूक व्यवस्थापक यशवंत हिंगे, जनसंपर्क अधिकारी नागेश गायकवाड तसेच PMPMLचे अधिकारी आणि कर्मचारी उपस्थित होते.
पावसाळ्यातील पर्यटनस्थळांचा सुरक्षित, आरामदायी आणि संस्मरणीय अनुभव घेण्यासाठी पुणेकरांनी ‘वर्षा सहल’ विशेष पर्यटन बस सेवेचा लाभ घ्यावा, असे आवाहन PMPMLच्या वतीने करण्यात आले आहे.
