खेड-आळंदी-चाकण भागातील शिवसेना पदाधिकाऱ्यांनी घेतली डॉ. गोऱ्हे यांची भेट
पुणे.दि.२: खेड-आळंदी-चाकण परिसरातील विकासकामांना अधिक गती देण्यासाठी शासनाच्या विविध योजनांची प्रभावी अंमलबजावणी होणे आवश्यक असून, स्थानिक गरजा लक्षात घेऊन विकासाचा सर्वंकष आराखडा तयार करण्यात येईल असे आश्वासन शिवसेना नेत्या व विधानपरिषद सदस्य डॉ. नीलम गोऱ्हे यांनी खेड-आळंदी-चाकण भागातील शिवसेना पदाधिकाऱ्यांना दिले.
खेड-आळंदी-चाकण भागातील शिवसेना पदाधिकाऱ्यांनी पुणे येथील सिल्व्हर रॉक्स या निवासस्थानी डॉ. गोऱ्हे यांची सदिच्छा भेट घेतली. यावेळी या भागातील विविध शासकीय योजनांच्या अंमलबजावणीचा सविस्तर आढावा घेण्यात आला. आगामी काळात शासनाच्या अधिकाधिक योजना प्रभावीपणे नागरिकांपर्यंत पोहोचविण्यासाठी पदाधिकाऱ्यांनी समन्वयाने काम करावे, असे मार्गदर्शन डॉ. गोऱ्हे यांनी केले.
महिला सक्षमीकरणाला प्राधान्य देत महिला शेतकरी ओळखपत्राचा अधिकाधिक लाभ मिळावा, महिला बचत गटांना शासकीय जमिनी उपलब्ध करून देण्यासाठी प्रस्ताव सादर करावेत, तसेच बचत गटांच्या माध्यमातून स्थानिक महिलांसाठी रोजगाराच्या नव्या संधी निर्माण करण्यावर विशेष भर देण्यात आला.
याखेरीज, इंद्रायणी नदी प्रदूषणमुक्त करण्यासाठी शासनस्तरावर आवश्यक त्या उपाययोजनांचा पाठपुरावा व चाकण औद्योगिक परिसरातील स्थानिक नागरिक आणि कामगारांना भेडसावणारे एमआयडीसीमधील विविध प्रश्न उद्योग विभागाच्या माध्यमातून सोडविण्यासाठी संबंधित यंत्रणांशी समन्वय साधून आवश्यक प्रयत्न करण्यात येतील, असे डॉ. गोऱ्हे यांनी स्पष्ट केले. तसेच, या भागातील विकासकामांसाठी शासनाकडून निधी उपलब्ध करून देण्यासाठी प्रयत्न करण्यात येतील, अशी ग्वाहीही डॉ. गोऱ्हे यांनी यावेळी दिली.
या भेटीप्रसंगी शिवसेना जिल्हाप्रमुख भगवान पोखरकर, उपजिल्हाप्रमुख प्रकाश वाडेकर, खेड तालुकाप्रमुख निलेश पवार, उपतालुकाप्रमुख दत्ताभाऊ राऊत, माजी उपसरपंच शरद जठार, सचिन लांडगे, खेड तालुका महिला आघाडी प्रमुख श्रद्धा सांडभोर, महिला आघाडीच्या सुषमा सांडभोर, उपसरपंच मोनिका जठार, सुवर्णा थिगळे, कल्पना म्हस्के, हेमलता भोपे आदी उपस्थित होते.
