ज्येष्ठ बासरीवादक पद्मश्री पंडित रोणू मजुमदार : भारती विद्यापीठ अभिमत विद्यापीठाच्या स्कूल ऑफ परफॉर्मिंग आर्ट्सतर्फे सन्मान
पुणे : भारतीय संगीत हे विशाल सागराप्रमाणे आहे. कोणत्याही कलाकाराला संपूर्ण संगीत एका आयुष्यात आत्मसात करणे अशक्य आहे. गायक, वादक किंवा नृत्यकलाकार असो, प्रत्येकाने सर्वप्रथम संगीताचा सखोल अभ्यास करणे आवश्यक आहे. संगीत सेवा म्हणजे एक प्रकारे कलाकाराचा स्वतःचाच शोध असतो, असे मत ज्येष्ठ बासरीवादक पद्मश्री पंडित रोणू मजुमदार यांनी व्यक्त केले.
भारती विद्यापीठ अभिमत विद्यापीठाच्या स्कूल ऑफ परफॉर्मिंग आर्ट्सतर्फे पंडित रोणू मजुमदार यांच्या सन्मान सोहळ्याचे तसेच बासरी वादन कार्यशाळेचे आयोजन करण्यात आले होते. यावेळी स्कूल ऑफ परफॉर्मिंग आर्ट्सचे प्रमुख पंडित शारंगधर साठे, पंडित अरुण कशाळकर आदी उपस्थित होते.
संगीत नाटक अकादमी पुरस्कार जाहीर झाल्याबद्दल पंडित अरुण कशाळकर यांचा, तसेच पद्मश्री पुरस्काराने सन्मानित झाल्याबद्दल पंडित रोणू मजुमदार यांचा स्कूल ऑफ परफॉर्मिंग आर्ट्सतर्फे सत्कार करण्यात आला.
पंडित रोणू मजुमदार म्हणाले, भारतीय संगीत क्षेत्रात गायन ही सर्वश्रेष्ठ कला आहे. प्रत्येक कलाकाराने गायनाचे अंग शिकले पाहिजे. आज अनेक बासरीवादक आणि विद्यार्थी केवळ प्रसिद्ध बासरीवादकांनाच ऐकतात. त्यामुळे त्यांच्या कलेत पूर्णता येत नाही. सर्वसमावेशकता येण्यासाठी प्रत्येक बासरीवादकाने गायनाचे शिक्षण घेणे आवश्यक आहे.
ते पुढे म्हणाले, प्रत्येक क्षेत्रात संघर्ष अटळ असतो. त्या संघर्षातून मिळणारे अनुभवच कलाकार घडवतात. कलाकार होणे सोपे नसते.
शारंगधर साठे म्हणाले, भारती विद्यापीठाच्या स्कूल ऑफ परफॉर्मिंग आर्ट्सने तयार केलेल्या अभ्यासक्रमामुळे गेल्या १८ वर्षांत अनेक गुणी कलाकार आणि विद्यार्थी घडले आहेत. पंडित रोणू मजुमदार यांचे पुत्र ऋषिकेश मजुमदार हेदेखील याच संस्थेचे विद्यार्थी आहेत. संस्थेच्या वाटचालीत पंडित रोणू मजुमदार यांचे मार्गदर्शन मोलाचे ठरले आहे.
पंडित अरुण कशाळकर म्हणाले, कलाकार म्हणून यशाला कोणतीही मर्यादा नसते. मात्र प्रत्येक कलाकाराला स्वतःचे समाधान शोधता आले पाहिजे. पुरस्कार मिळत असतात; मिळाले नाहीत तरी आपल्या कलेचे सादरीकरण करून त्यातून समाधान मिळवणे अधिक महत्त्वाचे आहे.
कार्यक्रमात हेमंत जोशी (तबला) आणि कल्पेश (बासरी) यांनी पंडित रोणू मजुमदार यांना साथ-संगत केली. कार्यक्रमाचे प्रास्ताविक शारंगधर साठे यांनी केले, तर सूत्रसंचालन प्रवीण कासलीकर यांनी केले.
पंडित रोणू मजुमदार यांनी शास्त्रीय संगीतातील आलाप, जोड, झाला आणि गत वादनाचे तंत्र, त्यामागील विचार व बारकावे प्रात्यक्षिकासह समजावून सांगितले. तसेच रागसंगीत, सुगम संगीत आणि चित्रपट संगीतात बासरीवादनाच्या विविध शैलींचे सादरीकरण करून त्यातील सूक्ष्म पैलू उलगडले. रागाचे चलन जपण्याचे महत्त्व आणि प्रभावी सादरीकरणाची पद्धत याविषयीही त्यांनी विद्यार्थ्यांना मार्गदर्शन केले.
