पुणे |
पुणेकरांसाठी दिलासादायक निर्णय घेत महापौर मंजुषा नागपुरे यांनी शहरातील पाणीकपात २२ जुलै २०२६ पर्यंत रद्द ठेवण्याच्या सूचना पुणे महानगरपालिका प्रशासनाला दिल्या आहेत.
शहराला पाणीपुरवठा करणाऱ्या धरण क्षेत्रात उपलब्ध पाणीसाठा आणि सध्याची जलस्थिती लक्षात घेऊन हा निर्णय घेण्यात आला आहे. त्यामुळे २२ जुलैपर्यंत पुणेकरांना नियमित पाणीपुरवठा करण्यात येणार आहे.
याबाबत माहिती देताना महापौर मंजुषा नागपुरे यांनी सांगितले की, २२ जुलैनंतर भारतीय हवामान विभागाने वर्तविलेला पावसाचा अंदाज, धरणांतील उपलब्ध पाणीसाठा, पाण्याची आवक तसेच एकूण जलस्थितीचा सविस्तर आढावा घेऊन पुढील निर्णय घेतला जाईल. नागरिकांच्या हिताला सर्वोच्च प्राधान्य देत परिस्थितीनुसार योग्य निर्णय घेण्यात येईल.
महापौरांनी पुणेकरांना पाणीपुरवठा नियमित सुरू असला तरी पाण्याचा वापर अत्यंत जबाबदारीने व काटकसरीने करण्याचे आवाहन केले आहे. पाणी ही अमूल्य नैसर्गिक संपत्ती असून, तिचा अपव्यय टाळण्यासाठी प्रत्येक नागरिकाने सहकार्य करावे, असेही त्यांनी नमूद केले.
