११२ अधिकारी लष्करात, १२ नौदलात, तर १७ हवाई दलात नियुक्त; फ्लाइंग ऑफिसर अनन्या फडके यांना राष्ट्रपती सुवर्णपदक
पुणे | प्रतिनिधी
सशस्त्र सेना वैद्यकीय महाविद्यालयाच्या (एएफएमसी) ६० व्या तुकडीचा दिमाखदार कमिशनिंग समारंभ पुण्यातील कॅप्टन देवाशीष शर्मा, कीर्ती चक्र परेड मैदानावर पार पडला. या समारंभात १४१ वैद्यकीय पदवीधरांना सशस्त्र दल वैद्यकीय सेवेत वैद्यकीय अधिकारी म्हणून नियुक्त करण्यात आले.
नवनियुक्त अधिकाऱ्यांपैकी ११२ जण भारतीय लष्करात, १२ जण भारतीय नौदलात आणि १७ जण भारतीय हवाई दलात दाखल झाले आहेत. एएफएमसीचे संचालक आणि कमांडंट लेफ्टनंट जनरल पंकज पी. राव यांनी ही माहिती दिली.
समारंभाचे निरीक्षण सशस्त्र दल वैद्यकीय सेवेच्या महासंचालक सर्जन व्हाइस ॲडमिरल आरती सारिन यांनी केले. त्यांनी कमिशनिंग परेडची पाहणी करून नवनियुक्त वैद्यकीय अधिकाऱ्यांचे अभिनंदन केले.
उत्कृष्ट गणवेश, अचूक कवायत आणि लष्करी शिस्तीचे दर्शन घडविणाऱ्या परेडचे नेतृत्व लेफ्टनंट निखिल कुमार झा यांनी केले. भारतीय लष्कर, नौदल आणि हवाई दलाच्या गणवेशातील नवनियुक्त अधिकाऱ्यांनी सलामी मंचासमोरून संचलन केले.
नवनियुक्त अधिकाऱ्यांना संबोधित करताना सर्जन व्हाइस ॲडमिरल आरती सारिन यांनी व्यावसायिक क्षमता, नैतिक वैद्यकीय आचरण, करुणा आणि कर्तव्याप्रती निष्ठा जपण्याचे आवाहन केले. शांतता काळासह संघर्ष, मानवतावादी मदत आणि आपत्ती निवारण मोहिमांमध्ये सेवा बजावताना लष्करी वैद्यकशास्त्राचे सर्वोच्च मानदंड कायम ठेवावेत, असेही त्यांनी सांगितले.
कमिशनिंग सोहळ्यानंतर आयोजित पुरस्कार वितरण समारंभात शिक्षण, नेतृत्व, क्रीडा आणि अभ्यासेतर उपक्रमांमध्ये उत्कृष्ट कामगिरी करणाऱ्या विद्यार्थ्यांचा गौरव करण्यात आला.
सर्वोत्कृष्ट सर्वांगीण कामगिरीसाठी दिले जाणारे प्रतिष्ठेचे राष्ट्रपती सुवर्णपदक आणि कलिंग चषक फ्लाइंग ऑफिसर अनन्या फडके यांना प्रदान करण्यात आले. अन्य गुणवंत विद्यार्थ्यांनाही विविध पदके, चषक आणि पारितोषिकांनी सन्मानित करण्यात आले.
एएफएमसीने लष्करी कारवाया, सार्वजनिक आरोग्य संकटे, मानवतावादी मदत, आपत्ती निवारण आणि शांतता मोहिमांमध्ये सेवा बजावणाऱ्या वैद्यकीय अधिकाऱ्यांच्या अनेक पिढ्या घडवल्या आहेत. नव्याने नियुक्त झालेले अधिकारी ‘स्वार्थापेक्षा सेवेला प्राधान्य’ या मूल्याचे पालन करत राष्ट्रसेवेसाठी सज्ज झाले आहेत.
