‘सेवा वारी’ उपक्रमांतर्गत पालखी सोहळ्यासाठी पुणे महानगरपालिका सज्ज
पुणे, दि. ८ जुलै : संतश्रेष्ठ ज्ञानेश्वर महाराज आणि जगद्गुरू संत तुकाराम महाराज यांच्या पालखी सोहळ्याचे गुरुवार, दि. ९ जुलै रोजी पुणे शहरात आगमन होत असून, वारकरी भाविकांच्या स्वागतासाठी आणि सेवेसाठी पुणे महानगरपालिकेने यंदा ‘सेवा वारी’ हा विशेष उपक्रम राबविला आहे. पालखी सोहळ्याच्या पार्श्वभूमीवर महापालिका प्रशासनाने मुक्कामस्थळे, निवास, आरोग्य, स्वच्छता, पाणीपुरवठा आणि इतर सर्व सुविधा सज्ज केल्या आहेत.
महापालिका आयुक्त नवल किशोर राम, अतिरिक्त आयुक्त प्रजीत नायर, अतिरिक्त आयुक्त ओमप्रकाश दिवटे, पालखी नोडल अधिकारी निखिल मोरे आणि उपायुक्त माधव जगताप यांनी पालखीच्या अंतिम मुक्कामस्थळांची प्रत्यक्ष पाहणी करून तयारीचा आढावा घेतला.
यंदा संत ज्ञानेश्वर महाराज पालखीच्या मुक्कामस्थळी उपलब्ध जागा पाचपट वाढवून ५,००० चौरस फूट करण्यात आली आहे. महिला आणि पुरुष वारकऱ्यांसाठी स्वतंत्र व सुसज्ज व्यवस्था करण्यात आली असून, पालखी सोहळ्याच्या इतिहासात प्रथमच विशेष जर्मन हँगर उभारण्यात आला आहे. येथे फिजिओथेरपीच्या विद्यार्थ्यांकडून वारकऱ्यांना मोफत फिजिओथेरपी आणि मालिश सेवा उपलब्ध करून दिली जाणार आहे.
वारकऱ्यांच्या सोयीसाठी शहरातील विविध ठिकाणी १९५ वॉटरप्रूफ मांडव उभारण्यात आले आहेत. तसेच मुक्काम आणि विश्रांतीसाठी पुणे महानगरपालिकेच्या १०१ शाळा खुल्या करण्यात आल्या असून, तेथे चोवीस तास मोफत वैद्यकीय तपासणी, औषधोपचार आणि औषधांचा पुरवठा केला जाणार आहे.
वारीच्या काळात शहरातील पाणीपुरवठ्यात विशेष वाढ करण्यात आली असून, वारकऱ्यांना पाण्याची कमतरता भासू नये यासाठी आवश्यक ती सर्व व्यवस्था करण्यात आली आहे. याशिवाय मार्गावरील आणि मुक्कामस्थळी मोठ्या संख्येने मोबाईल शौचालये उपलब्ध करून देण्यात आली असून, त्यांच्या स्वच्छतेसाठी स्वतंत्र कर्मचारी चोवीस तास कार्यरत राहणार आहेत.
पुणे महानगरपालिका प्रशासनाने ‘सेवा हीच वारी, राम कृष्ण हरी’ या भावनेतून सर्व अधिकारी आणि कर्मचाऱ्यांना प्रत्यक्ष मैदानात उतरविले असून, पुणेकर नागरिकांनीही माऊलींच्या सेवेत उत्स्फूर्तपणे सहभागी व्हावे, असे आवाहन करण्यात आले आहे.
