पुणे महानगर प्रदेश विकास प्राधिकरण (पीएमआरडीए)च्या अग्निशमन विभाग आणि पुणे महानगर आपत्ती प्रतिसाद पथकाने (PDRF) गेल्या २४ तासांत मुसळधार पावसामुळे निर्माण झालेल्या आपत्कालीन परिस्थितीचा यशस्वीपणे सामना केला आहे. लोणावळा, मावळ, खेड आणि लोहगाव परिसरातील पूरस्थिती व दरड कोसळण्याच्या घटनांमध्ये पथकाने दाखवलेल्या तत्परतेमुळे १०० हून अधिक नागरिकांचे तसेच एका मुक्या प्राण्याचे प्राण वाचवण्यात यश आले आहे.
प्रमुख रेस्क्यू ऑपरेशन्स
- वाकसई, लोणावळा (एकांत नगर): येथील वालोसिटी व्हिला, मँगो व्हिला आणि ओरिकल व्हिला या तीन निवासी घरांच्या अवतीभवती मोठ्या प्रमाणात पाणी साचले होते. घरात अडकलेल्या ३४ नागरिकांना पथकाने लाईफ रिंग, लाईफ जॅकेट आणि रोप (दोरी) यांच्या सहाय्याने सुरक्षित बाहेर काढले.
- मळवली (ता. मावळ): सूर्या व्हिला परिसरातील घराभोवती पाणी साचल्याने अडकलेल्या २० नागरिकांना आणि एका कुत्र्याला सुखरूप बाहेर काढण्यात आले.
○ मळवली-बोरज रोडवरील अंकित ग्रुप सोसायटी-२ (विंटर हार्वेस्ट-४२) येथून १५ नागरिकांचे यशस्वी रेस्क्यू करण्यात आले. - कार्ले-लोणावळा परिसर: माऊंट वेस्ट क्रिस्टा सोसायटीमध्ये पूरपरिस्थितीमुळे अडकलेल्या २१ नागरिकांना सुरक्षित ठिकाणी हलवण्यात आले.
○ इंडियन ऑईल पेट्रोल पंपाजवळ साचलेल्या पाण्यात अडकलेल्या ३ नागरिकांची सुखरूप सुटका करण्यात आली. - लोहगाव (आदर्श नगर): रस्त्यावर साचलेल्या पाण्यात एक बस पूर्णपणे अडकली होती. पथकाने तात्काळ घटनास्थळी पोहोचून बसमधील १० ते १२ प्रवाशांना सुरक्षित बाहेर काढले.
- ग्रीन लँड व्हिला, लोणावळा: पाण्यात अडकलेल्या २ वृद्ध व्यक्तींना आपत्ती प्रतिसाद पथकाने वेळेत सुरक्षित ठिकाणी पोहोचवले.
शोधमोहीम आणि इतर दुर्घटना
- भूस्खलन (दरड कोसळणे) – नॉर्थ पॉइंट व श्री सिक्स्टी रिसॉर्ट परिसर: या परिसरात भूस्खलन झाले असून काही व्यक्ती ढिगाऱ्याखाली अडकल्याची प्राथमिक माहिती समोर आली आहे. एसटीओ महाजन यांच्या मार्गदर्शनाखाली शोध व बचावकार्य युद्धपातळीवर सुरू आहे.
- बुडालेल्या व्यक्तींचा शोध (ता. खेड):
○ मौजे शेलू: पाण्यात बुडालेल्या १ व्यक्तीला शोधून बाहेर काढण्यात आले आहे.
○ मौजे रेटवडी: पाण्यात बुडालेल्या व्यक्तीच्या शोधकार्यासाठी PDRF चे पथक रवाना झाले असून शोधमोहीम सुरू आहे.
पॉलिहाऊस नर्सरीला लागलेली आग आटोक्यात
- लोणी काळभोर (थेऊर): ६ जुलै २०२६ रोजी रात्री २३.१६ वाजता पोर्ली फार्म (गट क्रमांक ३३५/३३६) येथील एका मोठ्या पॉलिहाऊस नर्सरीला आग लागली होती. आंधळे पोलीस स्टेशनकडून वर्दी मिळताच अग्निशमन दलाने घटनास्थळी धाव घेतली. होज रील तसेच दोन होज लाईन्सच्या सहाय्याने पाण्याचा मारा करून आग पूर्णपणे विझवण्यात आली.
🙏 नागरिकांना आवाहन
मुसळधार पाऊस आणि पूरसदृश परिस्थिती लक्षात घेता विनाकारण घराबाहेर पडू नका. कोणत्याही आपत्कालीन परिस्थितीत त्वरित प्रशासनाशी संपर्क साधा.
📞 महत्त्वाचे संपर्क क्रमांक
- आपत्ती व्यवस्थापन कक्ष: ९५४५२८२९३०
- नांदेड सिटी केंद्र: ०२०-६७५२०००१
- मारुंजी केंद्र: ०२०-६७९९२१००
- वाघोली केंद्र: ०२०-२९५१८१०१
