🟥 बुधवार पेठेत तरुणांना धमकावून तोडपाणी; दोन पोलिस अंमलदारांवर खंडणीचा गुन्हा

🟨 गुन्हा दाखल करण्याची धमकी देत ₹२ हजार ऑनलाइन उकळल्याचा आरोप; व्हिडिओ व्हायरल झाल्यानंतर कारवाई

पुणे | प्रतिनिधी

बुधवार पेठ परिसरात फिरण्यासाठी आलेल्या तीन तरुणांना गुन्हा दाखल करून न्यायालयात नेण्याची धमकी देत त्यांच्याकडून ऑनलाइन दोन हजार रुपये उकळल्याप्रकरणी फरासखाना पोलिस ठाण्यातील दोन पोलिस अंमलदारांविरुद्ध खंडणीचा गुन्हा दाखल करण्यात आला आहे. या घटनेमुळे पुणे पोलिस दलाच्या प्रतिमेवर प्रश्नचिन्ह निर्माण झाले आहे.

या प्रकरणी विवेक पाटील आणि राहुल दाभाडे या दोन्ही पोलिस अंमलदारांवर गुन्हा दाखल करण्यात आला असून, हडपसर येथील तुपे वस्ती परिसरातील २४ वर्षीय तरुणाने फिर्याद दिली आहे.

पोलिसांनी दिलेल्या माहितीनुसार, फिर्यादी आपल्या दोन मित्रांसह २९ जून रोजी शनिवारवाडा आणि लक्ष्मी रस्ता परिसर पाहण्यासाठी आला होता. रात्री साडेअकराच्या सुमारास बुधवार पेठ परिसरात नाकाबंदी सुरू असताना संबंधित पोलिस अंमलदारांनी तिघांना अडवून ओळखपत्राची मागणी केली. मोबाईलमधील ओळखपत्र दाखवूनही त्यांना गुन्हा दाखल करून न्यायालयात नेण्याची धमकी देण्यात आली.

कारवाई टाळायची असेल तर १५ हजार रुपयांची मागणी करण्यात आली. पैसे नसल्याचे सांगितल्यानंतर फिर्यादीला दुचाकीवरून बुधवार पेठेतील एका महिलेकडे नेण्यात आले. त्यानंतर त्याच्या हॉटेल मालकाकडून पूनम नावाच्या महिलेच्या खात्यावर ऑनलाइन दोन हजार रुपये जमा करून घेतल्याचा आरोप फिर्यादीने केला आहे. पैसे मिळाल्यानंतर हा प्रकार कुणाला सांगितल्यास गंभीर परिणाम भोगावे लागतील, अशी धमकी देत तिघांना सोडून देण्यात आल्याचे तक्रारीत नमूद आहे.

घरी परतताना घाबरलेल्या तरुणांनी हा प्रकार कॅब चालकाला सांगितला. कॅब चालकाने या घटनेचा व्हिडिओ तयार करून तो समाजमाध्यमांवर प्रसारित केला. त्यानंतर वरिष्ठ पोलिस अधिकाऱ्यांनी चौकशी केली असता संबंधित पोलिस अंमलदारांनी तरुणांना धमकावून पैसे उकळल्याचे निष्पन्न झाल्याने दोघांविरुद्ध खंडणीचा गुन्हा दाखल करण्यात आला.