🟥 भीमा खोऱ्यात मान्सूनची सलग फलंदाजी; प्रमुख धरणांतील पाणीसाठा वाढू लागला

🟨 मुळशी, भाटघर, पवना, नीरा देवघरसह अनेक धरणांना मान्सूनचा दिलासा

पुणे, दि. ५ : भीमा खोरे पूरनियंत्रण कक्षाच्या सायंकाळी ५ वाजताच्या अहवालानुसार, भीमा खोऱ्यात मान्सूनचा जोर कायम असून प्रमुख धरणांमधील उपयुक्त पाणीसाठ्यात लक्षणीय वाढ होत आहे. मुळशी, भाटघर, पवना, नीरा देवघर, भामा-आसखेड, पानशेत, वरसगाव, चासकमान यांसह अनेक धरणांना पावसाचा चांगला दिलासा मिळाला असून आगामी काळात आणखी पाऊस झाल्यास जलसाठ्यात भर पडण्याची अपेक्षा आहे.

पुणे शहराला पाणीपुरवठा करणाऱ्या खडकवासला धरणसाखळीत सध्या १६२.०९ दशलक्ष घनमीटर (५.७२ TMC) उपयुक्त पाणीसाठा उपलब्ध असून तो एकूण क्षमतेच्या १९.६३ टक्के आहे. या साठ्यात पानशेत, वरसगाव, टेमघर आणि खडकवासला या चारही धरणांचा समावेश आहे.

भीमा खोऱ्यातील प्रमुख धरणांमध्ये मुळशी येथे ४.४२ TMC, भाटघर येथे ३.३३ TMC, भामा-आसखेड येथे २.६५ TMC, पानशेत येथे २.६५ TMC, नीरा देवघर येथे २.६२ TMC, वरसगाव येथे २.५५ TMC, पवना येथे २.२९ TMC, वीर येथे २.०१ TMC, चासकमान येथे १.१२ TMC आणि आंद्रा येथे १.०० TMC इतका उपयुक्त पाणीसाठा नोंदविण्यात आला आहे.

आज सर्वाधिक पावसाची नोंद वडिवळे (७५ मिमी), पवना (७४ मिमी), आंद्रा (७० मिमी), मुळशी (६१ मिमी), चासकमान (५९ मिमी) आणि कळमोडी (५१ मिमी) धरणक्षेत्रात झाली. त्यामुळे येत्या काही दिवसांत धरणांमधील पाणीसाठ्यात आणखी वेगाने वाढ होण्याची शक्यता व्यक्त केली जात आहे.

सध्या बहुतांश धरणांतून मोठ्या प्रमाणावर विसर्ग सुरू नसला तरी पावसाचा जोर कायम राहिल्यास परिस्थितीनुसार विसर्गात वाढ केली जाऊ शकते. त्यामुळे नदीकाठच्या नागरिकांनी प्रशासनाच्या सूचनांचे पालन करावे, असे आवाहन जलसंपदा विभागाने केले आहे.