पुणे | प्रतिनिधी
पुणे शहर भारत–जपान तंत्रज्ञान सहकार्याचे महत्त्वपूर्ण केंद्र बनण्याच्या दिशेने आणखी एक पाऊल पुढे पडले आहे. जपानमधील आयएम कॉर्पोरेशनचे अध्यक्ष रेन्या किकुची आणि वरिष्ठ सल्लागार ताकाशी इतामिया यांनी फिडेल सॉफ्टटेकचे संस्थापक-अध्यक्ष सुनील कुलकर्णी व व्यवस्थापकीय संचालक प्राची कुलकर्णी यांच्यासमवेत महत्त्वपूर्ण बैठक घेतली. माहिती तंत्रज्ञान तज्ज्ञ डॉ. दीपक शिकारपूर यांनी या बैठकीत समन्वयक व प्रेरक म्हणून मार्गदर्शन केले.
बैठकीत कृत्रिम बुद्धिमत्ता (AI), डिजिटल अभियांत्रिकी, संशोधन-विकास, नवसंकल्पना, तंत्रज्ञानाधारित गुंतवणूक आणि उच्च-कौशल्याधारित रोजगारनिर्मिती यांसह भारत–जपान तंत्रज्ञान सहकार्य अधिक दृढ करण्यावर सविस्तर चर्चा झाली.
यानंतर शिष्टमंडळाने महापौर मंजूषा नागपुरे यांची सदिच्छा भेट घेतली. शहर विकास, तंत्रज्ञान सहकार्य, कौशल्यविकास, गुंतवणूक आणि रोजगारनिर्मिती यांसह विविध विषयांवर सकारात्मक चर्चा झाली.
यावेळी फिडेल सॉफ्टटेक जपानने भारतातील विस्तारासाठी पुणे शहराची निवड केल्याची माहिती देण्यात आली. प्रस्तावित विस्तार प्रकल्पांतर्गत पुढील पाच वर्षांत १,००० हून अधिक उच्च-कौशल्याधारित माहिती तंत्रज्ञान क्षेत्रातील रोजगार उपलब्ध होणार असल्याचे सांगण्यात आले.
या उपक्रमामुळे कृत्रिम बुद्धिमत्ता, सॉफ्टवेअर विकास, डिजिटल अभियांत्रिकी आणि संशोधन-विकास क्षेत्रांना चालना मिळणार असून, विशेषतः जपानी भाषा अवगत असलेल्या तरुणांसाठी जागतिक दर्जाच्या करिअरच्या नव्या संधी निर्माण होणार आहेत.
भारत–जपान औद्योगिक आणि तंत्रज्ञान सहकार्य अधिक बळकट करण्याच्या दृष्टीने हा प्रकल्प महत्त्वाचा टप्पा ठरणार असून, पुणे शहराला जागतिक तंत्रज्ञान नकाशावर अधिक सक्षम स्थान मिळण्यास मदत होईल, असा विश्वास यावेळी व्यक्त करण्यात आला.
