फुरसुंगीत कपड्यांच्या दुकानातून ₹४.५० लाखांची रोकड चोरी; आंबेगाव, कोथरूडमध्येही गुन्हे दाखल
पुणे | प्रतिनिधी
पुणे शहरात ऑनलाइन फसवणूक, चोरी आणि मारहाणीच्या घटनांमध्ये वाढ होत असून, कोथरूड परिसरातील एका ३४ वर्षीय व्यक्तीची शेअर मार्केटमध्ये भरघोस परतावा मिळवून देण्याचे आमिष दाखवत तब्बल ₹१३ लाख ३१ हजार १०८ रुपयांची ऑनलाइन फसवणूक करण्यात आल्याचा धक्कादायक प्रकार उघडकीस आला आहे. याप्रकरणी कोथरूड पोलीस ठाण्यात अज्ञात मोबाईलधारक, टेलिग्राम अकाउंटधारक आणि लिंक वापरकर्त्याविरुद्ध गुन्हा दाखल करण्यात आला असून पोलीस अधिक तपास करत आहेत.
पोलिसांनी दिलेल्या माहितीनुसार, फिर्यादी त्यांच्या भावाच्या मोबाईलवर टेलिग्राम पाहत असताना आरोपींनी लिंक पाठवून शेअर मार्केटमध्ये गुंतवणूक केल्यास मोठा नफा मिळेल, असे आमिष दाखवले. विश्वास संपादन केल्यानंतर विविध व्यवहारांच्या माध्यमातून त्यांच्याकडून ₹१३.३१ लाख उकळण्यात आले. फसवणूक झाल्याचे लक्षात आल्यानंतर त्यांनी कोथरूड पोलीस ठाण्यात धाव घेतली.
दरम्यान, फुरसुंगी परिसरात कपड्यांच्या दुकानात घरफोडी करून चोरट्यांनी कॅश काऊंटर आणि ड्रॉवरमधील ₹४ लाख ५० हजारांची रोकड लंपास केली. दुकानाच्या दुसऱ्या मजल्यावरील लोखंडी खिडकीचे गज उचकून आरोपींनी दुकानात प्रवेश करून चोरी केल्याचे तपासात समोर आले आहे. या प्रकरणी फुरसुंगी पोलीस ठाण्यात गुन्हा दाखल करण्यात आला आहे.
आंबेगाव परिसरात आणखी एका व्यक्तीची एपीके (APK) फाईल पाठवून मोबाईल हॅक करण्यात आला. मोबाईलचा ताबा मिळवल्यानंतर आरोपींनी संबंधित व्यक्तीच्या बँक खात्यातून ₹२ लाख ६२ हजार ४९९ रुपये काढून आर्थिक फसवणूक केली. याप्रकरणी आंबेगाव पोलीस ठाण्यात माहिती तंत्रज्ञान कायद्यान्वये गुन्हा दाखल करण्यात आला आहे.
याशिवाय, कोथरूडमधील जयभवानीनगर परिसरात जुन्या वादातून एका तरुणावर लोखंडी हत्याराने हल्ला करून त्याला जखमी केल्याची घटना घडली. या प्रकरणी कोथरूड पोलीस ठाण्यात संबंधित कलमान्वये गुन्हा नोंदविण्यात आला असून पुढील तपास सुरू आहे.
पुणे शहर पोलिसांनी नागरिकांना ऑनलाइन गुंतवणुकीच्या आमिषांना बळी न पडण्याचे, कोणतीही APK फाईल किंवा संशयास्पद लिंक डाउनलोड न करण्याचे तसेच अशा प्रकारची फसवणूक झाल्यास तातडीने जवळच्या पोलीस ठाण्यात किंवा सायबर हेल्पलाइनवर संपर्क साधण्याचे आवाहन केले आहे.
