महिलांच्या नावावरील ५०० चौरस फुटांपर्यंतच्या घरांना मिळकतकरात ५० टक्के सवलतीला मंजुरी

पुणे-: पुणे महापालिका हद्दीतील फक्त महिलांच्या नावावर असलेल्या ५०० चौरस फुटांपर्यतच्या निवासी मिळकतींना मिळकत करात ५० टक्के सवलत देण्याच्या प्रस्तावाला सर्वसाधारण सभेने मान्यता दिली आहे. आता प्रस्ताव राज्य सरकारकडे अंतिम मंजुरीसाठी पाठविण्यात येणार आहे. त्यानंतर या निर्णयाची प्रत्यक्षात अमंलबजावणी होणार आहे.
महानगरपालिका अधिनियमातील कलम १४०-अ आणि १४०-ब अंतर्गत करसवलतीसंबंधी तरतुदींचा आधार घेत हा प्रस्ताव तयार करण्यात आला आहे. मात्र, या योजनेची अंमलबजावणी काही अटी व शर्तीवर आधारित असेल. त्यानुसार ३१मार्च २०२५ रोजी ज्या मिळकती महिलांच्या नावावर नोंद आहेत, त्यांनाच या योजनेचा लाभ मिळणार आहे. ही सवलत केवळ आर्थिक वर्ष २०२६-२७मधील चालू मागणीपुरती मर्यादित राहील. दि. १ एप्रिल २०२६ पूर्वीची थकबाकी, तसेच व्याज, दंड आणि शास्तीवर कोणतीही सवलत लागू होणार नाही. अनधिकृत मिळकतींवर लागू असलेली शास्ती कायम राहणार असून, संबंधित कलम २६७ (अ) अंतर्गत नियम लागू राहतील. तसेच, ज्या मिळकतींना सध्या ४० टक्के सवलत लागू आहे, त्यांना ५० टक्क्यांऐवजी २५ टक्के सवलत देण्याचा प्रस्ताव आहे. महिलांसाठी खास ही योजना आहे.सुमारे ७० हजार ७७३ मिळकतींना होणार लाभ
महापालिकेच्या नोंदीनुसार महिलाच्या नावावरील मिळकतींची संख्या या समारे सुमारे ७० हजार ७७३ इतकी आहे. या मिळकतींकडून मिळकत कराच्या रूपाने सुमारे ४०.४८ कोटी रुपये उत्पन्न मिळते. प्रस्तावित ५० टक्के सवलतीमुळे महापालिकेच्या उत्पन्नात अंदाजे २० कोटी रूपये कमी होणार आहे. या योजनेमुळे महिला सक्षमीकरणास प्रोत्साहन मिळणार आहे,महिलांच्या नावे मालमत्ता नोंदणीस प्रोत्साहन देणे व आर्थिक सक्षमीकरण, हाच योजनेमागील उद्देश आहे. असे स्थायी समितीचे अध्यक्ष श्रीनाथ भिमाले यांनी सांगितले.