पुणे महापलिकेत घडला अजब गजब प्रकार — जय श्रीराम म्हणत गैरबाबींना अनाहुतपणे दिला पाठींबा
पुणे :
काल पुणे महापालिकेच्या सकाळी ११ वाजताच्या सर्वसाधारण सभेला सव्वा अकरा वाजता सुरवात झाली तरीदेखील भाजपचे अनेक नगरसेवक सभागृहात आलेले नव्हते. या संधीचा फायदा घेत अयोध्येतील ऐतिहासिक श्रीराम मंदिरातील कथित चोरीच्या निषेधाची आणि चोरीवर कडक कारवाईची तहकूब काँग्रेसने मांडली. पण चक्क भाजपने यास विरोध करत हि तहकुबी फेटाळून लावली . भाजप च्या उपस्थित असलेल्या सर्व ३१ नगरसेवकांनी तहकुबीच्या विरोधात मतदान करत ती फेटाळली.
पुणे महापालिकेच्या सर्वसाधारण सभेला सकाळी ११ वाजता सुरुवातहोणार होती. पण महापौर मंजूषा नागपुरे या १५ मिनिटे उशिरा आल्या. त्यामुळे सर्वसाधारण सभेचे कामकाज सकाळी ११.१५ वाजता सुरू झाले. त्यावेळी भाजपचे केवळ २१ नगरसेवक सभागृहात उपस्थित होते. नगरसेवकांची आवश्यक गणसंख्या (कोरम) पूर्ण न झाल्याने सभा तहकूब करावी लागते की काय?, अशी भीती सत्ताधारी नेत्यांना सतावत होती. यामुळे सभागृह नेते गणेश बिडकर आणि भाजपचे ज्येष्ठ नगरसेवकांची धावपळ सुरू होती .
काँग्रेसचे गटनेते चंदूशेठ कदम यांनी यावेळी अयोध्येतील श्रीराम मंदिरातील कथित चोरीचा निषेध करणारी आणि चोरी करणारांना कडक शासन करण्याची मागणी करणारी तहकूबी मांडली. ‘हा श्रद्धेचा आणि सुरक्षेचा विषय असून यावर तातडीने चर्चा झालीच पाहिजे’ अशी मागणी काँग्रेसचे नगरसेवक प्रशांत जगताप यांनी केली.अरविंद शिंदे यांनी आम्हाला तहकुबीवर बोलायचे असे जाहीर सांगितले त्यावर महापौर मंजूषा नागपुरे यांनी विरोधकांना भाषणाची संधी दिल्यास मोठी नाचक्की होईल, हे ओळखून थेट तहकूबीवर मतदान घेण्याचे आदेश दिले. त्यामुळे तहकूबीच्या विरोधात ३१ मते पडली, तर बाजूने उपस्थित विरोधकांची केवळ ४ मते पडली. भाजपने बहुमताच्या जोरावर ही तहुकबी फेटाळली.
